Almens una centena de personas mòrtas e qualques desenas de nafradas es lo tragic bilanç del darrièr atac de l’armada israeliana contra una escòla de Gaza, çò rapòrta Fanpage.it que mençona de sorsas medicalas del territòri palestinian. Lo nombre de victimas es encara provisòri. Segon las autoritats sanitàrias palestinianas, l’aviacion bombardèt una escòla tresmudada en refugi dins la vila de Gaza. L’armada israeliana reconeis l’atac mas en pretendent d'aver tocat un centre de comandament de l'Hamas escondut dins la bastissa.

Per l’Hamas, l’atac de l’escòla representa una “escalada perilhosa”, çò rapòrta l’agéncia de defensa civila de Gaza. “Lo massacre dins l’escòla At-Tābi’īn, dins lo quartièr de Daraj del centre de la vila de Gaza, es un crime òrre que constituís una escalada perilhosa”, çò diguèt dins un comunicat.

L’apèl de Kamala Harris per una alta al fuòc

Aquestas darrièras oras, la vicepresidenta estatsunidenca e candidata democrata Kamala Harris a tornat parlar de la guèrra de Gaza, en demandant una alta al fuòc: “Ara es lo moment d’arribar a un acòrdi d’alta al fuòc, lo president e ieu trabalham infatigablament per l’obténer ,” çò assegurèt pendent un recampament que s'adreiçava als manifestants pròpalestinians.