Lo 3 d’agost passat, raportàvem la remesa en libertat del jornalista bascorús Pablo González après una encarceracion de dos ans e mièg sens jutjament ni pròvas. Long d’aquel periòde avèm raportat sa situacion. Ara, González a parlat pel primièr còp dins una entrevista amb lo Canal 1 de la television russa.

Pendent l’entrevista, González assegurèt èsser pas brica un espion en contant las duras condicions que patiguèt dins las presons polonesas de Rzeszów e Radom. Coma o expliquèt, foguèt somés a d’abuses psicologics, perdèt mai de dotze quilos e èra en confinament solitari dins una cellula de seguretat maximala. Malgrat la pression per que se reconeguèsse colpable, mantenguèt qu’èra innocent e resistiguèt a d’ensages d’intimidacion.

La detencion

Acusat d’èsser un espion rus, Pablo González foguèt arrestat lo 28 de febrièr de 2022 en Polonha del temps que cobrissiá coma jornalista l’arribada dels refugiats ucraïneses sul territòri polonés. González explica que l’anèron arrestar a l’ostalariá e que li demandèron de se reconéisser colpable, mas ditz que sabiá pas de qué parlavan. “Sabètz ben de qué vos acusam”, çò li respondèron. Foguèt sens avocat pendent dètz meses e mes dins una cellula amb un criminal perilhós per ensajar de l’intimidar. Afirma que i patiguèt d’abuses psicologics e perdèt mai de dotze quilos.

Pendent son temps dins la preson de Rzeszów (Polonha), afirma que l’avocat polonés insistissiá sul fach que valiá mai que se reconeguèsse espion. Mas cap d’acusacion formala li foguèt pas presentada e sa detencion preventiva foguèt perlongada. Sus aquò, son companh de cellula, que venguèt un amic, li contèt que s’agissián d’aquel biais èra perque avián pas res e que valiá mai de declarar pas res.

Lo menèron alara a la preson de Radom e lo metèron dins una cellula de seguretat maximala, en isolament. Segon González, i passèt un moment fòrça penós; i fasiá fòrça freg l’ivèrn e fòrça calor l’estiu, e tot aquò en de condicions igienicas òrras. Reclamèt de psicològs, mas aquestes aguèron l’efièch contrari. Segon çò qu’explica a la television, lo psicològ fasiá de monològs. Quand lo bascorús li diguèt que se trobava pas ben e qu’aviá mal, lo psicològ li respondèt: “Podètz totjorn ensajar de vos suicidar.”

D’acusacions “ridiculas”

A prepaus de las acusacions d’espionatge, las considèra “ridiculas”. Segon el, l’an acusat perque a dos passapòrts, mas jamai se n’èra amagat e son passapòrt espanhòl precisa sa naissença en Russia. Apond que, s’aquò èra estat lo cas, seriá estat mai subtil e, per exemple, auriá pas donat a totes sos enfants de prenoms russes.

Sas originas

Son grandpaire fugiguèt l’estat espanhòl devèrs l’URSS pendent la guèrra civila espanhòla. Quand l’Union Sovietica s’esfondrèt, son grand tornèt en Russia acompanhat de Pablo e de sa maire divorciada. Coma lo paire de Pablo es rus, lo jornalista basco a dos ciutadanatges e dos passapòrts: un rus e un espanhòl. Son nom original es Pavel Aleksievich Rubtsov, mais a tanben lo de Pablo González Yagüe, segon los noms d’ostal de sa familha mairala. Estudièt la filologia a Barcelona e venguèt jornalista dins l’ancian espaci sovietic. Sus aquò, el assegura que se considèra pas coma un jornalista de guèrra, e mai se trobèsse en d’endreches tocats per la guèrra.

Desenant, vòl contunhar de far lo jornalista, sens ne precisar ça que la lo luòc ni l’ora. Mentretant, demòra en Russia ont se vòl restablir de l’experiéncia de sa detencion.

Lo cas de González a generat de polemicas e de questions suls limits de la libertat de premsa en temps de conflicte, mai que mai dins un contèxt tan tibat coma la guèrra en Ucraïna.