Actualitats
Blocats dins l’espaci
Dos astronautas dels Estats Units, que prevesián de tornar lèu sus Tèrra, son obligats de perlongar lor sojorn dins l’Estacion Espaciala Internacionala a causa de problèmas tecnics amb lo vaissèl Starliner que los transportava
Tèxte legit
Los astronautas Butch Wilmore, 61 ans, e Suni Williams, 58 ans, devián tornar sus Tèrra fa mai d’un mes, mas demòran blocats a bòrd de l’Estacion Espaciala internacionala (IEI), çò rapòrta Fanpage. Totes dos partiguèron lo 5 de junh dins l’encastre d’una mission del programa Starliner de Boeing, qu’aviá per mira d’esprovar lo comportament del vaissèl espacial pendent un viatge dins l’espaci. Se la mission iniciala deviá pas durar que qualques jorns, de problèmas tecnics an perlongat lor sojorn a l’IEI, e i poirián èsser constrenches de demorar encara qualques meses.
Los problèmas comencèron pendent lo viatge cap a l’ISS, quand los astronautas detectèron de pèrdas dins lo sistèma de propulsion del Starliner. Malgrat que capitèsson a aténher l’estacion espaciala en tota seguretat, aqueles problèmas an conduch la NASA a jutjar pauc segura l’utilizacion d’Starliner pel viatge de retorn. Pendent una conferéncia de premsa, Steve Stich, gestionari del programa dels esquipatges comercials de la NASA, expliquèt que, e mai lor opcion preferida foguèsse d’utilizar Starliner, d’autras alternativas èran a far un trabalh d’avaloracion per far tornar Wilmore e Williams sus Tèrra.
Una de las opcions mai probablas es de profechar d’una futura mission d’SpaceX, prevista per setembre, amb lo veïcul Crew Dragon. Aquela mission, que deviá inicialament transportar quatre astronautas cap a l’ISS, poiriá reduire son esquipatge a dos membres per permetre a Wilmore e Williams de rintrar sus Tèrra en febrièr de 2025.
Malgrat aqueles contratempses, totes dos astronautas se carrejan plan e dispausan de pro de provisions per subreviure. La NASA mandèt fa gaire un avitalhament en noiridura e en vestits per s’assegurar que suportèsson plan lor sojorn perlongat a l’IEI. D’autre caire, es important de se remembrar, dins d’assages espacials coma aquel, que las agéncias espacialas e los quites astronautas prenon en compte la possibilitat que las missions pòscan durar mai que çò qu’èra previst. Mas, justament perque son conscients d’aquela possibilitat, trabalhan d’avança sus de solucions alternativas.
American astronauts Barry "Butch" Wilmore and Sunita "Suni" Williams are indefinitely stranded in Space. pic.twitter.com/eZlrw7ul2k
— E! News (@enews) August 10, 2024
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
Baste foguèsse l'Elon Musk e tornèsse pas pus!
Los efièches perverses de l'uberisacion. E ne sem qu'a la debuta !
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari