Los Dragons avián fòrça a se faire perdonar aqueste divendres de ser a Huddersfield. En dètz minutas, mostrèron mai de jòc e de volontat que lo dimenge passat a Londres! Un còp que menèron 14-0, tornèron prene la formula “en dent de ressèga”. Los marrits moments (penalitats, carton jaune, passas dins lo voide) alternèron amb lo jòc construsit. Los catalans vegèron los angleses tornar a 14-10 a la pausa. Tornèron marcar dos ensages per portar la marca a 22-10. Los locals egalizèron mercé a doas ensages transformats. Artús Morgue aguèt la bona idèa d’ensacar lo tombat de la victòria (23-22) a tres minutas del tèrme!

Victòria d’un punt tanben, 17-16 per St Helens que recebiá Salford. Hull KR, que rescontrarà los Dragons aqueste dimenge dins l’encastre de la Dimenjada Magica, es plan mai fòrt que Castleford: 36-6.

Dimenge, Londres a tornat trapar sa costuma de pèrdre: 22-36 fàcia a Warrington alara que Leigh domina Hull FC: 42-12.

Aprèp la Dimenjada Magica e una novèla setmana passada en Anglatèrra, los catalans aniràn puèi afrontar Leeds qu’a batut Wigan 30-4 e ven un concurrent seriós per la qualificacion per las fasas finalas.

Darrièras minutas fatalas al TO

En Championship, dins las darrièras minutas, lo Tolosa Olimpic pren l’avantatge just abans la fin, mas es crucificat sus la darrièra accion: los occitans concedisson la victòria a Doncaster: 20-18. Aqueste dissabte 17 d’agost, los olimpians reçaupràn York.

NRL: los jogaires, òmes de publicitat

Coma los jornalistas de BeInSport an pres un pauc de vacanças, la cadena retransmet de partidas d’NRL en version originala. A la pausa, se poguèt veire las publicitats de la cadena esportiva autraliana: lo mesclanha de las Pantèras Nathan Cleary fa la publicitat d’un desodorant plan conegut; los sostens de Penrith espèran la liurason de pol fregit; s’anóncia las reservacions de plaças per las partidas a Las Vegas lo 1r de març venent: un autre mond, una autra planeta...

Aquestes dijòus, divendres e dissabte, èra de bon ton de ganhar al defòra: la Tempèsta cò dels Lapinons: 26-16; las Làmias cò dels Titans: 44-0; Penrith s’impausa a Parramatta dins las darrièras minutas 36-34; Manly ganha a Canberra: 46-24; los Dògols baton los Dragons 28-10 e Brisbane s’organiza un barbacoa festiu cò dels Vaquièrs: 42-18!

Per contra dimenge, per ganhar, caliá marcar 34 punts: los Dalfins baton dificilament los neozelandeses 34-32 alara que Newcastle desvolopa son jòc fàcia a de Tigres tendres: 34-18.

Dijòus, los primièrs dos de la competicion, Melbourne e Penrith, se rescontraràn.

De notar que los neozelandeses jògan totas las partidas de la sason a domicili dins d’estadis qu’afichan complet!

Cambiament de nom

A la rintrada, caldrà pas pus dire: campionat d’Elèit 1, mas… Super-XIII! Segur qu’aquesta modificacion de nom o càmbia tot!