Dissabte passat, 10 d'agost, lo president de Brasil, Luiz Inácio Lula da Silva, confirmèt son engatjament per la demarcacion de las tèrras del pòble guaraní kaiowà dins l'estat de Mato Grosso del Sud.

Pendent una reünion a Brasília, ont recebèt una delegacion d’aquel pòble autoctòn e de membres del secretariat general del govèrn e de la Fondacion Nacionala pels Indigènas (FUNAI), Lula faguèt saber qu’èra informat de la violéncia que ne son victimas los pòbles indigènas, e anoncièt la creacion d’un grop de trabalh per susvelhar la situacion. Prometèt tanplan de començar los trabalhs d'avaloracion de las tèrras dins las setmanas avenidoiras.

Aquò es la seguida del gabinet de crisi guarani kaiowà, creat en 2023, centrat sus la garentida de la seguretat per la polícia estatala, l’accès a l’aiga e l’investiment dins las infrastructuras necessàrias.

En julhet passat, lo pòble guaraní kaiowà faguèt tornarmai una crida al Mond per sa subrevivéncia. Dins un messatge clar e desesperat, soslinhavan cossí patissián un genocidi, un ecocidi e un epistemicidi (destruccion de coneissenças). En seguida, Lula vesitèt lo territòri acompanhat d’una cortègi federal, e mostrèt sa determinacion a respondre a las demandas istoricas de demarcacion de las tèrras per aqueles pòbles.

La demarcacion es la revendicacion principala de totes los pòbles originaris de Brasil que vòlon que las autoritats definiscan e delimiten los territòris indigènas e n’i permetan pas los tenements agricòlas o minièrs. Lo govèrn precedent d’extrèma drecha de Jair Bolsonaro n’arrestèt lo procès e mai tornèt autorizar l’esplecha minièra d’aquelas tèrras.

En 2012 e 2013, aviam ja raportat dins las paginas de Jornalet la crida del pòble guaraní kaiowà, qu’es una de las comunautats indigènas mai nombrosas de Brasil. Solament dins l’estat del Mato Grosso del Sud, son 30 000 individús.

Pendent la dictatura militara de Brasil, los grands entrepreneires agricòlas, diches “fazendeiros“, desplacèron de milièrs d’indigènas de lor país. Quand la dictatura tombèt, en 1985, lor retorn comencèt, mas los indigènas rescontrèron la resisténcia armada dels quites fazendeiros e dels esbirros armats qu’engatjan, los “jagunços“. Aital, lo retorn dels guaranís kaiowàs en cò lor foguèt recebut amb de fusilhadas. Mai d'un foguèron assassinats e fòrça autres se suicidèron. La violéncia fa ja d’ans que dura, e qualques organizacions internacionalas se son mobilizadas per ajudar los guaranís kaiowàs.

Ao lado dos ministros @GuajajaraSonia, @MarcioMacedoPT e @Pimenta13Br, e da presidenta da Funai, @JoeniaWapichana, recebi uma comitiva de lideranças Guarani-Kaiowá para tratar do conflito no Mato Grosso do Sul, que se intensificou nos últimos dias.

📸 @ricardostuckertpic.twitter.com/gzPkF0UmFk

— Lula (@LulaOficial) August 10, 2024