Es dins l’estadi del club de fotbòl de Leeds que se debanavan aqueste dissabte 17 e dimenge 18 d’agost las partidas de la Dimenjada Magica.

Dissabte, Wigan confirmava sa posicion de primadièr en batent Saint Helens 20-0. Warrington balhava un còp de man als catalans en batent Leeds 24-6. Londres signava sa tresena victòria de la sason fàcia a Hull FC 29-4.

Dimenge, Leigh dominava Salford 26-0.

Los catalans dintravan sus la pelena fàcia a Hull KR amb nòu jogaires occitans e catalans e lo novèl centre australian Reimis Smith, amb Ikavalu a una ala e Julian Bosquet en tresena linha, mas sens Sam Tomkins tocat fàcia a Huddersfield. Ikavalu èra rapidament nafrat. A la pausa, Hull menava 12-4, tres ensages a un. Tre la represa, la defensa catalana èra mistificada pel tresena-linha anglés qu’anava entre los pals. Novèl ensag anglés dètz minutas mai tard. Los Barbarosses ajustaràn encara tres ensages. Aürosament que lo butaire d’Hull tustava amb d’esclòps al pè: solament 2 transformacions encapadas sus 8 amb 3 palmas mandadas suls pals! Fin finala, desfaita catalana: 4-36! Per clavar la Dimenjada, Huddersfield batiá Castleford: 20-12.

Novèla partida en Anglatèrra aqueste divendres 23 de ser pels catalans qu’afrontaràn Leeds, que demòra un concurrent per la qualificacion per las pelhòfas, abans la recepcion de Wigan a Perpinhan (dissabte 31, a 21h).

Tolosa aima pas lo cambajon

D’aquesta passa, en Championship, es pas la granda forma del costat del Tolosa Olimpic que pèrd una novèla partida sus sa pelena fàcia a Yòrk: 12-20, abans d’anar desfisar Featherstone aqueste dissabte 24 d’agost.

NRL: la Tempèsta bufa fòrt

La 24a jornada del campionat NRL vegèt dijòus lo davantièr Melbourne anar batre lo segond Penrith: 24-22. Un avantgost de las fasas finalas…

Las autras sèt partidas vegèron las victòrias de las formacions que recebián:

• Divendres, Manly batiá los neozelandeses 24-10 e los Polets dominavan las Anguialas 38-14.

• Dissabte, victòrias aisidas pels Dògols fàcia als Dalfins (30-10) e dels Vaquièrs fàcia a Canberra (42-4), alara que los Tigres emportavan la victòria 18-16 fàcia als Lapinons.

• Dimenge, los Dragons de Sant Jòrdi batián los Titans 32-16, e las Làmias, mercé a un tombat dins lo temps del punt en aur, se desfasián de Newcastle 19-18.