Dempuèi lo 8 de julhet, la comuna de Mandatluec e la Napola (Vencenc) a instaurat un arrestat controversiat qu’enebís l’accès a las plajas e al banh a las personas amb de tengudas jutjadas non confòrmas a las règlas d’igièna e susceptiblas de provocar de trebols a l’òrdre public, çò rapòrta France Bleu. Aquel arrestat, percebut per fòrça coma una mesura antiburquini, es estat contestat davant lo tribunal administratiu de Niça per la Liga dels dreches de l’Òme e una abitanta de la comuna.

La comuna, dirigida pel cònsol màger dels Republicans Sébastien Leroy, defend aquel arrestat en argüissent tant de la necessitat de manténer la seguretat e la tranquillitat de las plajas coma de prevenir las incivilitats e los trebols ligats a la salubritat publica. Dins son comunicat, la municipalitat afirma son drech de reglamentar l’accès a las plajas davant l’afluéncia estivenca.

Pasmens, per la Liga dels dreches de l’Òme e l’avocat Rafik Chekkat, que representa una abitanta afectada per aquela mesura, aquel arrestat constituís un atac a las libertats fondamentalas. Segon Chekkat, de nombrosas personas, en particular las de confession musulmana que pòrtan lo burquini, evitan d’ara enlà las plajas per crenhença de sancions.

Aquela contèsta es pas la primièra. En 2023, un arrestat similar foguèt suspendut pel Conselh d’Estat après èsser estat inicialament validat pel tribunal administratiu, qu’aviá invocat un contèxt de tensions interreligiosas. Lo Conselh d’Estat aviá puèi anullat l’arrestat, lo jutjant contrari a las valors de laïcitat e atemptatòri a la libertat de consciéncia, a la libertat de circulacion e a la libertat personala.

Lo burquini foguèt creat per l'australiana musulmana d'origina libanesa Aheda Zanetti per la marca Ahiida en 2004, fa ara vint ans. Lo tèrme burquini e sos equivalents en d'autras lengas provenon de las marcas comercialas Burqini e Burkini, un mot-valisa que combina los mots burqa e biquini.

📢 Le maire de Mandelieu-la-Napoule est à l'origine d'un arrêté qui interdit l'accès aux plages et à la baignade aux personnes vêtues d'une tenue "non-respectueuse des règles d'hygiène et de sécurité". Les femmes peuvent être verbalisées si elles se baignent en burkini… pic.twitter.com/bfHx71m2NE

— RMC (@RMCInfo) August 21, 2024