CAPÇALERA PAIS INVISIBLE

Actualitats

Sciéncia

De scientifics ciutadans de la NASA descobrisson un objècte que se desplaça a 1,6 milion de km/h

L’objècte celèst, que se dirigís cap a l’espaci intergalactic, poiriá aperténer a una de las primièras generacions d’estelas de nòstra galaxia

De scientifics ciutadans de la NASA descobrisson un objècte que se desplaça a 1,6 milions de km/h
De scientifics ciutadans de la NASA descobrisson un objècte que se desplaça a 1,6 milions de km/h | Observatòri W. M. Keck/Adam Makarenko

Tèxte legit

De scientifics ciutadans (valent a dire de personas non professionalas que collabòran a la recèrca scientifica) que trabalhan sul projècte “Backyard Worlds: Planet 9” de la NASA an recentament descobèrt un objècte que se desplaça a una velocitat vertiginosa, mai o mens 1,6 milion de quilomètres per ora, e s'escapa de la Via Lactèa. Segon l’agéncia espaciala nòrd-americana, aquela descobèrta es realizada a partir de las donadas del telescòpi WISE (Wide Field Infrared Explorer, en occitan “explorador d’infrarojes de camp larg”) de la NASA, vengut en 2013 NEOWISE (Near-Earth Object Wide-field Infrared Survey Explorer, “explorador d’infrarojes de camp larg pels objèctes pròche la Tèrra” ); es lo primièr còp que s’identifica un objècte de la talha d'una estela pichona amb una tala velocitat.

Al contrari de las estelas que seguisson tranquillament lor orbita a l'entorn del centre de la Via Lactèa, aquel objècte, sonat CWISE J1249, es en rota per quitar nòstra galaxia e se dirigir cap a l'espaci intergalactic. Sa febla massa lo destria tanben d'autres còsses celèstes, e los scientifics trantalhan encara per lo classificar entre una estela de febla massa o una nana bruna.

Çò que rend aquela descobèrta encara mai pivelaira es la composicion inabituala de CWISE J1249, revelada per l'observatòri W. M. Keck a Maunakea (Hawaii). L'objècte conten mens de fèrre e d'autres metals que la màger part de las estelas e de las nanas brunas, çò que suggerís que poiriá aperténer a una de las primièras generacions d'estelas de nòstra galaxia.

Doas ipotèsis principalas explican sa velocitat extrèma: poiriá provenir d'un sistèma binari amb una nana blanca qu'explosèt en supernòva, o d'un amàs globular d'ont seriá estada ejectada en seguida d’un rescontre amb de traucs negres. La descobèrta es estada una collaboracion entre benevòls, professionals e estudiants, illustrant aital lo poder de la sciéncia ciutadana.

 

 

 

Etiquetas

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article