Enter lo diluns 19 e lo dimars 20 d’aost de 2024, la Tor deu Borrèu, locau politic e culturau, l’avó en mira ua ataca fascista. Segon Occitània Arroja, dotze pegasolets miaçaires qu’èran estats apausats sus la pòrta, los contravents e lo gotèr deu bastiment. Aqueths pegasolets que representavan scènas violentas on fascistas agredivan fisicament e miaçavan de mort los antifascistas.

Un militant de l’associacion qu’administra la Tor, tanlèu descobèrts aqueths pegasolets, suu pic alertè la polícia. “Quan vedoi aqueste rambalh, sustot las miaças de mort, ne toquèi pas arren entà non pas cobrir las o los autors: qu’aperèi de tira la polícia”, ce a explicat. Las fòrças de l’ordi que procedín puish aus relhevats necessaris abans de perméter lo retirament deus pegasolets restants.

L’associacion qu’a rapidament denonciat aqueth acte de vandalisme e las miaças de mort qui l’acompanhavan. Lo militant que s’ei mostrat ironic tà çò de la cobertura mediatica de l’incident, soslinhant l’interès abituau de la premsa entaus discors politics violents.

N’ei malaürosament pas lo prumèr còp que la Tor deu Borrèu pateish aqueth genre d’atacas. Lo militant remembra que, dus ans an, simbòls nazis estón pintrats sus la pòrta deu locau, e que los autors estón condemnats. Totun, l’associacion que contunha lo son tribalh, fièra deus sons 32 ans d’engatjament, e qu’obrirà las soas pòrtas com previst las dimenjadas venentas.

Àudio generat automaticament per votz.eu