Lo trio de rap irlandés Kneecap, compausat de Mo Chara, Moglai Bap e DJ Provai, protagonizan un filme biografic sus lor pròpria istòria de succès e sul vam qu’an portat a la lenga irlandesa. En mai d’aquò, lo filme es estat causit coma un dels candidats oficials d’Irlanda pels prèmis Oscar de 2025. Los membres de la banda interprètan coma actors lors pròpris ròtles.

Lo filme, entotitolat tot simplament Kneecap, mòstra lo viatge del grop dempuèi lo començament dins l’oèst de Belfast fins a sa reputacion internacionala en despièch de las criticas recebudas per las polemicas suscitadas per las paraulas de sas cançons e sos vejaires politics.

Lo filme Kneecap es estat comparat amb d’òbras coma Trainspotting e 8 Mile, e i participa l’actor germanoirlandés Michael Fassbender. Fa gaire, lo filme ganhèt lo prèmi del public al festenal del cinèma de Sundance.

Defensa de la lenga

La còla de Kneecap son plan coneguts per lor defensa del gaelic e lors criticas de l’influéncia britanica sus l’Irlanda del Nòrd, e an ajudat a far créisser l’interès per l’aprendissatge de la lenga, mai que mai demest las generacions mai joves. “Recebèm fòrça messatges de mond que se son inspirats de nòstra musica per aprene l’irlandés”, ditz Mo Chara dins una entrevista que la publica Sky News.

Malgrat las controvèrsias, Kneecap a atench un succès remarcable, tant dins l’encastre musical coma cinematografic, e contunhan d’èsser una votz importanta dins lo movement per la reconeissença del gaelic irlandés. Amb lor apròchi desinvòlt mas seriós, lo grop a trespassat de frontièras musicalas e mai es vengut un actor màger de la respelida culturala de l’Irlanda del Nòrd.