Ne sèm a las darrièras jornadas de la fasa de classament en Austràlia (encara 2 jornadas) e en Euròpa (encara 4 jornadas) abans de ne venir a las pelhòfas.

Los Dragons son pas encara qualificats

La qualificacion per las fasas finalas demòra en question pels Dragons Catalans. Se se mostrèron a lor avantatge pendent lo primièr temps a Leeds, tombèron puèi dins los travèrses costumièrs (indisciplina, jòc al pè previsible, defensa elastica al ras del tengut…) que permetèron als locals de véncer 18-6 se raprochar a dos punts dels catalans al classament. Leigh, aprèp sa victòria a Londres 32-12, torna a un punt dels catalans. E aqueste dissabte 31 d’agost, a 9 oras del ser, es lo campion Wigan, venceire d’Hull FC 22-4 aqueste dimenge, que ven jogar a Brutus. Amb de jogaires clau absents, es una partida decisiva que los Sang e Aur son apelats a jogar. Los sostens seràn nombroses e demòra d’esperar que crits e cants decuplaràn lo vam de la formacion.

Saint Helens, a egalitat de punts amb los Sang e Aur, es tanben en dificultat: batut sus sa pelena 6-42 per Hull KR. Salford ten ara dos punts d’avança suls Dragons aprèp la larga victòria 60-10 fàcia a Huddersfield.

Pichona novèla positiva: las doas partidas a venir dels Dragons a Perpinhan seràn retransmesas en dirècte a la television (e non sus Internet) per la cadena L’Équipe.

Tolosa a l’arrèst

Tresena desfaita en seguida en Championship pel Tolosa Olimpic, batut a Featherstone  22-10. Los Blau e Blanc se devon balhar los mejans de tornar avançar en ganhant fàcia a Sheffield que recebon aqueste dissabte, en fin de vèspre. La segonda plaça dels occitans ten a un fial: un sol punt d’avança sus Sheffield .

NRL: l’omenatge a Shaun Johnson

Dijòus, los darrièrs, los Tigres, joguèron un torn a las Aglas de Manly en los batent 34-26.

Divendres, l’estadi d’Auckland èra batejat per l’escasença Shaun Johnson Stadium per saludar la darrièra partida a domicili del menaire de jòc emblematic dels Combatents Neozelandeses que prendrà la retirada esportiva d’aicí a quinze jorns. La fèsta foguèt pas complata: l’esquipa neozelandesa subiguèt la lei dels Dògols: 18-34. Los Cavals Fòls batèron las Anguialas 30-24.

Dissabte, Newcastle es anat batre los Lapinons 36-16. Penrith se faguèt susprene a Canberra (18-22) e rejonherà pas Melbourne per la primièra plaça: una Tempèsta sens pietat pels Dalfins: 48-6.

Las Pantèras passan de la segonda a la quatrena plaça, doblats pels Polets, venceires cò dels Titans 48-22, e per las Làmias qu’an ganhat cò dels Dragons: 38-10.

Suricats provençals

Lo club de XIII de Morièras, en Vauclusa, ten un animal totemic original: lo suricat!