Dempuèi l’instauracion de novèlas restriccions pel govèrn taliban, las femnas en Afganistan se tròban un còp de mai al còr d’una batalha per lors dreches fondamentals, çò rapòrta Le Monde. La darrièra en data es una lei qu’enebís a las femnas de cantar, de legir en public e quitament de se desplaçar solas. Aquela legislacion, en vigor dempuèi la fin de julhet, s’inscriu dins l’encastre d’un decret per “promòure la vertut e prevenir lo vici”, segon los precèptes de la sharia. 

Demest las novèlas mesuras detalhadas dins l'article 13 de la lei, que concernís las règlas aplicablas a las femnas, lor es impausat de se cobrir entièrament lo còrs en public, e mai la cara, per evitar de “temptar” los òmes. Lors vestits devon pas èsser “ni fins, ni sarrats, ni corts”. Las femnas son d'ara enlà obligadas de se cobrir quitament davant los òmes e las femnas non musulmans per evitar la “corrupcion”. An pas pus drech de se perfumar o de se maquilhar, e son pas pus autorizadas a agachar los òmes amb los quals son pas ligadas per la sang o lo maridatge – e vice-vèrsa – , ni a se desplaçar sens un mahram (un òme de lor familha).

Malgrat aquelas interdiccions, fòrça afganas an causit de resistir en utilizant los rets socials per far ausir lor votz. De desenats de femnas an postat de vidèos dins los quals se filman a cantar, en mostrant sovent sonque una partida de lor cara per protegir lor identitat. Aquelas accions, simbolicas e coratjosas, an per mira de denonciar l’opression dont son victimas e d’afirmar que lor votz pòt pas èsser reducha al silenci.

D’unes d’aqueles videos mòstran de femnas vestidas de negre del cap als pès, amb un vel que lor cobrís la cara, cantant de paraulas ponhentas. “M’avètz reducha al silenci per las annadas avenidoiras”, çò declara una d’elas, “m’avètz empresonada en çò mieu pel sol crime d’èsser una femna”.

De grops de militantas jonhon tanben aquel movement en linha, en brandissent lo ponh o esquiçant de fòtos del cap suprèm dels talibans, l’emir Haibatullah Akhundzada. “La votz d’una femna es la votz de la justicia”, çò martèla un grop dins un vidèo. Sus X (ancianament Twitter), Taiba Sulaimani canta a cara descobèrta, afirmant amb fòrça que “la votz d’una femna es son identitat, pas quicòm que deuriá èsser amagat”.

Aqueles actes de resisténcia mòstran que, malgrat la repression, las femnas afganas son pas prèstas per renonciar a lor identitat e lor libertat de s’exprimir.

Afghan women are responding to the Taliban's ban on women speaking in public by launching a campaign and singing out loudly. pic.twitter.com/0r884tkteS

— Habib Khan (@HabibKhanT) August 27, 2024