capçalera campanha

Actualitats

InternacionalPoliticaSocietat

Aliot vòl pas donar lo prèmi de la vila de Perpinhan al fotojornalista palestinian Loay Ayyoub

L’incident causat pel cap de l’extrèma drecha francista a marcada la ceremònia d’inauguracion del festenal internacional Visa Pour l’Image

Aliot vòl pas liurar lo prèmi de la Vila de Perpinhan al fotojornalista palestinian Loay Ayyoub
Aliot vòl pas liurar lo prèmi de la Vila de Perpinhan al fotojornalista palestinian Loay Ayyoub

Tèxte legit

Louis Aliot, cònsol màger de Perpinhan pel Recampament Nacional e vicepresident d'aquel partit ultranacionalista francista, a refusat d’autrejar lo prèmi Visat d’Aur Rémi Ochlik 2024 de la vila de Perpinhan al fotojornalista palestinian Loay Ayyoub durant la ceremònia d’inauguracion del festenal Visat per l’Imatge (Visa pour l’Image, oficalament en francés). Aqueste fotojornalista es un collaborador de The Washington Post e sos articles son tanplan publicats e traduches en catalan dins Vilaweb.

Ayyoub, venceire del guierdon per sa sèria de fotografias sus la vida vidanta en Gaza jos l’ofensiva israeliana, es criticat per Aliot per aver qualificat suls rets socials de “resisténcia palestiniana” l’Hamas, lo movement islamista que cometèt lo massacre de massa del 7 d’octòbre de 2023 e prenguèt 252 israelians en ostatge, provocant la brutala reaccion armada de Tsahal. De notar qu'aquesta reaccion militara auriá tuats mai de 40 000 palestinians, e es considerada coma “un risc de genocidi” per la Cort Internacionala de Justícia de las Nacions Unidas. Mentretant, lo govèrn d'israèl, dominat per l'extrèma drecha, refusa d'arrestar la colonizacion de Palestina e de reconéisser son estat, pasmens ja reconegut oficialament per 147 estats membres de l'ÒNU.

L’incident del prèmi de la vila de Perpinhan se tenguèt dissabte de ser, pendent la ceremònia d’inauguracion del festenal. Al moment de remetre lo guierdon a Ayyoub, Aliot assolidèt qu’èra pas estat assabentat de l’identitat del ganhaire, e mai faguèsse de jorns qu’èra public. De soslinhar que, per totas las edicions, lo ganhaire del prèmi es causit per una jurada compausada de prestigioses directors de fotografia.

 

 

 

 

 

 

 

 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Bandièra05 1180x150: PUBLICITAT

Comentaris

Pitèas
1.

Pas estonant. L'Aliot anava pas sacar per tèrra tota son estrategia per amagar l'antisemitisme inerent al Front National, aquesta estrategia que li a permés de traucar lo "ponde de veire" e far de sa còla lo primièr partit de França. Cal pas enfuscar los Klarsfeld que li anèron manjar dis la man quand lor autregèt la medalha de la vila de Perpinhan. (Aquò dich amb tot mon respècte pels Klarsfeld per lor trabalh... fins a aquesta medalha.)

  • 16
  • 7

Escriu un comentari sus aqueste article