Las partidas se seguisson pels Dragons Catalans e lor marcha en arrièr se perseguís.

Aqueste dissabte, a Brutus, davant mai de 11 000 espectators, recebián lo campion Wigan. A la pausa, las doas formacions èran a egalitat: 12-12. A la represa, dos ensages angleses refregèron las ambicions catalanas e un ensag en tota fin de partida podiá pas èsser qu’una magra consolacion. Desfaita: 18-26.

Dins los adversaris dirèctes, se Salford pleguèt a Hull KR 12-32, Leigh batiá Warrington 16-12, St Helens anava ganhar a Huddersfield 18-10 e Leeds batiá Londres 21-20 al punt en aur.

Al classament, se Hull KR, Warrington e Wigan son en camin per la qualificacion, avèm darrièr:

4) St Helens: 28 punts (diferéncia punts marcats/encaissats: +192)

5) Salford: 28 punts (- 2)

6) Leigh: 27 punts (+164)

7) Dragons: 26 punts (+38)

8) Leeds: 26 punts (+28).

Sièis esquipas seràn qualificadas. Dissabte, los Dragons an una primièra partida decisiva de jogar a Salford. Saupràn las resultas de las partidas de divendres: Leigh a Castleford; Saint Helens a Warrington alara que Leeds reçauprà Hull FC.

Demorarà apuèi doas partidas per n’acabar amb la fasa de classament fàcia als dos darrièrs: recepcion de Londres a Perpinhan lo dissabte 14, puèi desplaçament cò d’Hull FC.

NRL: jogar d’a fons fins a la darrièra minuta

En Austràlia, d’esquipas qu’an pas res mai a ganhar fan ça que la lo jòc e venon perturbar las certituds.

Melbourne, assegurat de la primièra plaça, botèt dotze jogaires de l’esquipa primièra al repaus e, logicament, perdèt cò dels Vaquièrs 30-38.

Shaun Jonhson acabèt sa carrièra esportiva amb un còp de pè a seguir sus la còrna que menèt l’ensag de la victòria dels neozelandeses fàcia a las Làmias: 30-28, de Làmias privadas atal, probable, de la segonda plaça.

Segonda plaça que los Polets poguèron pas assegurar, batuts per Canberra que li demòra un plan ipotetic espèr de qualificacion. Desfaita: 12-14.

Es atal que Penrith, venceire dels Lapinons 34-12, recupèra la segonda plaça.

La fasa de classament se clavarà amb un classic dèrbi de Sydney entre Polets e Lapinons, e dimenge, la tota darrièra partida entre Newcastle e los Dalfins determinarà lo ueiten qualificat per las pelhòfas.

Championship: Tolosa se reviscòla

Tolosa arrèsta la tièra de las desfaitas en batent aqueste dissabte las Aglas de Sheffield: 32-12. Tornan prene atal la segonda plaça al classament. Aqueste dissabte, los Blau e Blanc se desplaçaràn a Barrow.

Imatge:

Fouad Yaha capitèt d’escapar a la defensa anglesa

http://www.catalansdragons.com/photo-1406-1559-35558-6s4a1159/