Israèl visquèt diluns passat sa primièra cauma generala dempuèi lo començament de la guèrra en Gaza fa gaireben 11 meses. La mòrt de sièis ostatges israelians, que lors còrsss foguèron recuperats dins lo sud de la Lista de Gaza, an provocada una èrsa d'indignacion publica contra las accions del primièr ministre Benjamin Netanyahu.

Histadrut, lo sindicat màger del país, faguèt una crida a la cauma après que de protèstas massivas aguèron exigit que Netanyahu arribèsse a un acòrdi amb l’Hamas per liberar los ostatges encara captius. De milièrs de personas paralisèron lo país, en tocant de sectors clau coma los transpòrts, amb l’aeropòrt de Tel-Aviv que foncionèt a mièjas, e d’autres servicis coma los espitals, que lor foncionament foguèt sonque parcial.

La Cort del Trabalh d’Israèl jutgèt que la cauma èra “politica e illegala”, çò qu’obliguèt Histadrut de la cancelar abans que comencèsse. Ça que la, las manifestacions foguèron plan nombrosas, mai que mai dins de vilas coma Tel-Aviv e Jerusalèm, ont fins a 500 000 personas s’èran ja amassadas dimenge per demandar la demission de Netanyahu. De soslinhar que, dempuèi lo començament de la guèrra cada setmana, de desenats de milièrs d’israelians protèstan en demandant un nòu acòrdi suls ostatges encara en captivitat, e mai se la condicion es la fin de la guèrra

Las protèstas mòstran lo malcontentament creissent de la populacion israeliana per la manca de resultats dins las negociacions per liberar los 101 ostatges que son encara detenguts en Gaza. Dins aquel contèxt, lo govèrn israelian mòstra de signes de division, amb lo ministre de la defensa, Yoav Gallant, que demanda un cambiament d'estrategia que tròba de resisténcias dins los sectors mai extremistas de l'executiu.

Hamas deten a l’ora d’ara 101 ostatges, après aver capturadas 252 personas dins lo massacre de massa que cometèt lo 7 d’octòbre de 2023. La brutala reaccion armada de Tsahal auriá tuats mai de 40 000 palestinians, e es considerada coma “un risc de genocidi” per la Cort Internacionala de Justícia de las Nacions Unidas. Mentretant, lo govèrn d'israèl, dominat per l'extrèma drecha, refusa d'arrestar la colonizacion de Palestina e de reconéisser son estat, pasmens ja reconegut oficialament per 147 estats membres de l'ÒNU.