Òm se planhís plan sovent de l’auséncia de programacions occitanas. En Aude, l’estiu, sèm plan servits costat aquel grand silenci… Mas vaquí que per la rintrada e, en particular, per aqueste dissabte 14 de setembre, la causida va èsser plan malaisida…

Del País de Saut a l’Oklahoma

L’IEO Aude, la Bibliotèca e lo Cineclub de Limós prepausan una tièra de rendètz-vos dins la capitala mondiala de la blanqueta.

A la Bibliotèca, es presentada fins al 13 de setembre la mòstra de CORDAE-La Talvera sul Legendari occitan. Danièl Loddo farà una conferéncia sul subjècte divendres 13 (20h30, sala L-Costes).

En preambul, dimars 10 (18h30), a Malràs, sesilha de contes ont las mitonas (las fadas de las aigas, contadas per Joan-Jaume Delpotz) balhan rendètz-vos al Joan de l’Ors (contat per Alan Roch).

Dissabte 14, a l’Elisi (es lo nom del cinèma local!), se poirà véser de vèspre los documentaris de Patric La Vau sul contaire Pèire Pous e sus l’arqueològ Joan Guilaine. Aprèp un manjadreit, en serada, projeccion d’Un pont a l’ensús de l’Ocean. Patric La Vau, Francís Fourcou e Joan Guilaine seràn presents per dialogar amb lo public.

L’Escòla de Bodega festeja sos vint ans

A Vilardonèl, en Montanha Negra, aqueste dissabte 14, l’Escòla de Bodega festejarà sos vint ans dins lo vilatge que portèt pèira al reviscolament de l’instrument emblematic de la Montanha Negra. Aquesta reviudacion de la bodega (que d’unes disián completament passada de mòda) mas que, en Aude, Charles Alexandre (a Vilardonèl, justament), Didièr Olive, Sòfia de Dixmude e d’autres se destinèron a son estudi, a la recèrca de son istòria e de sos repertòris, e a son interpretacion. La tradicion vòl que las bodegas animen la messa de mièjanuèit de Nadal dins la glèisa del vilatge, alara que d’un temps l’instrument èra fòrabandit dels oficis, vist coma diabolic!

Long de la jornada, a la Comuna, se tendràn una mòstra de fotografias e un talhièr de factura d’instrument. A 14h30, presentacion del conte musical tot-public La cabra e lo bodegaire. A 15h30, eveniment bèl: tenguda d’un campionat mondial de Bodegaires dobèrt a totas e totes, bodegaires e crabaires (mai d’una categoria e d’un nivèl). A 6 oras del vèspre, serà lo moment del grand passacarrièra al son de… las bodegas ! Precedirà un aperitiu musical e la taulejada (sus inscripcion).

A nòu oras del ser, vendrà lo temps del grand-super-maxibalèti menat de segur per l’Escòla de Bodega amb lo concors de Bodegam-Bal, Fresquèl, Frezinat e la participacion de convidats suspresa (entresenhas e inscripcions: +33(0)6 32 58 68 35 o didierbabou11@outlook.fr).

Lo Festicanton de Sopèx

En Lauragués, a l’iniciativa del fogal local dels Joves, se tendrà dissabte 14 e dimenge 15, una segonda edicion del Festicanton.

Aquò començarà dissabte de vèspre amb un passacarrièra dels festaires. Seguirà una passejada contada bilingua a la descobèrta del patrimòni local, abans una conferéncia sul campèstre medieval en Lauragués. Aprèp lo sopar (salsissa-mendilhs), balèti amb la Nilha.

Dimenge, long de la jornada, un mercat local de productors e d’artisans, mòstra de tractors, jòcs pels pichons, mòstras, partidas de tambornet… ritmaràn la manifestacion. A 11h, concèrt del grop Tresluc dins la glèisa. A miègjorn, vendrà lo moment de l’incontornable e obligatòri caçolet (se marcar: lesjeunesdesoupex@gmail.com). A 15h, los Cazelòts ensajaràn de faire digerir tot aquel brave monde. Barradura umoristica amb la prestacion de Florant Mercadièr: Occitània pels nuls (17h).

Los 10 ans de l’Ostal occitan de Narbona

Dissabte 14, de vèspre e en serada, l’Ostal Occitan de Narbona festejarà sos 10 ans amb tota una tièra de jòcs en primièr abans de contes amb Gui Sié (16h15), los cantaires de Mossan (17h30), los discorses oficials e l’aperitiu (18h30), lo sopar occitan (freginat o falafèl) preparat per las calandretas (19h) e, en serada, un grand balèti que 4 grops animaràn.

Festiv’Ostal a Puèglaurenç

S’arribatz pas de causir entre aqueles rendètz-vos audencs, podètz trapar refugi en Tarn a Puèglaurenç per una tresena edicion del Festiv’Ostal:

• divendres 13: concèrt celtic de la formacion Araëlle https://www.araelle.com

• dissabte 14: polifonias occitanas amb la Mal Coiffée, alt-dark-pòp amb Ely Beth e afrobeat amb lo Tropical Orchestra.

… E es pas acabat!

D’autres rendètz-vos seguiràn:

• lo dimars 17, a l’Ostal de Cabardés d’Argon, Fasètz la Lenga en Cabardés organizarà son primièr Estanquet de la sason

• lo dissabte 21 e lo dimenge 22 (11h-12h), dins l’encastre de las Jornadas del Patrimòni, a l’Ostal de la Lana e del Drap de Carcassona, lo grop Parlatge (IEO Aude) legirà de tèxtes jol titol "La lana dels motons" (reservacion: https://www.tourisme-carcassonne.fr/toutes-les-experiences/journees-europeennes-patrimoine-carcassonnne/).

• A Grussan, dimenge 22, estapa del festenal "Los trobadors cantan l’art roman" amb un concèrt del Trobadors Art Ensemble (18h).

• Entre lo 18 de setembre e lo 10 d’octòbre, l’IEO Aude prepausarà cinc rendètz-vos escritura amb d’escrivans, una istoriana, etc.