capçalera campanha

Actualitats

Societat
crotz-tolosaCreated with Sketch.ProvençaComtat VenaicinComtat Venaicin

Afar dels viòls de Masan: una femna conta d’annadas de viòls organizats per son èx-marit

Dominique Pelicot es acusat d’aver drogada sa molhèr Gisèle pendent gaireben un decenni per que d’autres òmes abusèsson sexualament d’ela

Afar dels viòls de Masan: una femna conta d’annadas de viòls previstes per son èx-marit
Afar dels viòls de Masan: una femna conta d’annadas de viòls previstes per son èx-marit

Tèxte legit

Una femna de 72 ans contava dijòus a la cort d’Avinhon son istòria espaventosa après èsser estada drogada e violada per de desenats d’òmes dempuèi gaireben un decenni. La presumida victima, Gisèle Pelicot, raportèt cossí son marit, Dominique Pelicot, la droguèt e convidèt d’òmes a abusar d’ela del temps qu’èra inconscienta, de crimes que durèron entre 2011 e 2020.

Davant lo tribunal e qualques unes dels 51 acusats, Gisèle exprimiguèt la dolor d’aver descobèrda la vertat après que la polícia li aguèt mostradas de fotografias d’ela meteissa dins de situacions òrras que se’n recordava pas. La femna contèt que son “mond s’èra esfondrat” quand s’èra avisada de la multipla traïson de son espós, amb qui aviá partejats 50 ans de maridatge. Las pròvas comprenon de centenas de vidèos e de fotografias trobadas dins los aparelhs electronics de Pélicot.

Lo ministèri public afirma que Dominique Pelicot recrutèt d’òmes sus Internet e fixèt de règlas estrictas per empachar sa femna de se desrevelhar pendent los viòls. S’estima que Gisèle foguèt assautada per almens 72 òmes en 92 escasenças. Ara Gisèle vòl que “la vergonha càmbie de costat”, coma o diguèt son avocat al començament del procès.

Pelicot desmentís pas los faches, mas qualques unes dels òmes acusats an afirmat que sabián pas que la femna èra drogada, en assegurant que pensavan qu’aquò fasiá partida d’un acòrdi dins lo parelh.

Aquel afar a tresvirats Occitània e lo Mond entièr e a mes en evidéncia lo problèma de la somission quimica. De personatges politics coma la deputada centrista Sandrine Josso, victima d’un crime similar, an manifestat publicament lor sosten a Gisèle, en demandant mai de sensibilizacion e de justícia per las victimas d’aquela mena de violéncias. Es previst que lo jutjament s’acabarà lo 20 de decembre d’ongan.

 

 

 

 

 

Etiquetas

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Bandièra05 1180x150: SIDILLÀ

Comentaris

Franc Bardòu
1.

"Aquel afar a tresvirats Occitània e lo Mond entièr e a mes en evidéncia lo problèma de la somission quimica." Lo problèma, ieu, non lo vesi aquí. Qué pensavan e qué sentián aqueles "al mens 72" gòrris que passèron "92 còps" subre aquesta dòmna ? D'ont lor venon tenèbras tant escuras a l'èime ? E perqué son marit organizèt tot aquel carnala d'orror ? Pel ponhon, sonque ? O per quicòm d'encara mai tenebrós ? La somission quimica non es lo problèma : lo problèma es la volontat de sometre e d'abusar, quimicament o non.

  • 11
  • 0

Escriu un comentari sus aqueste article