En dintrant sus la pelena de Salford, los catalans sabián que Leigh aviá ganhat a Castleford 34-12, que Leeds aviá estrilhat Hull FC 68-6 e que Saint Helens s’èra inclinat a Warrington 16-2. Per se ganhar una plaça de qualificat per las pelhòfas, demorava als Sang e Aur d’emportar la partida. E foguèt pas lo cas, que la volontat e la determinacion èran del costat dels Diables Roges, menats de man de mèstre per Marc Sneyd, e al final un 12-27: aquò fa una quatrena desfaita en seguida pels catalans que veson s’alonhar las perspectivas de qualificacion.

Doas victòrias, tre dissabte a Brutus fàcia a Londres, puèi la setmana seguenta a Hull FC, daissarián la pòrta just entredobèrta per una fin positiva qu’es de fait plan magrinèla. A la fin de la partida, lo capitani Garcia anonciava sa vergonha pel jòc produsit.

Tolosa s’impausa a Barrow

En Championship, a Barrow, Tolosa fa la diferéncia dins lo primièr temps 22-0 e empòrta la partida fin finala 36-24, çò que li permet de demorar a la segonda plaça al classament que permetriá mièja finala a domicili. Dissabte, en fin de vèspre, las Pantèras d’Halifax jogaràn a Ernèst Wallon.

Dos França-Liban

La Federacion ven d’anonciar dos rescontres internacionals entre França e Liban: lo dimenge 13 d’octòbre a Pàmias e lo dissabte 19 d’octòbre a Albi. Lo 22, dins l’encastre d’un torneg europèu, los Blaus rescontraràn Ucraïna a Carcassona, puèi lo ganhant de la partida Galas-Serbia lo dissabte 26 a Perpinhan.

La seleccion francesa U19 s’envolarà per Austràlia lo 25 de setembre. Jogarà tres partidas e, en particular, rescontrarà la formacion dels Schoolboys lo 8 d’octòbre. 

NRL: lo uèiten qualificat es Newcastle!

Se pòt pas dire que mancan del sens de la dramaturgia en NRL. A calgut esperar la tota darrièra partida de la sason regulara per saupre lo nom del ueiten qualificat. Newcastle es estat mai fòrt que l’autre pretendent, los Dalfins 14-6.

Melbourne a tornat sortir sa gròssa esquipa per anar batre los Bròncos 50-12. Penrith assegura la segonda plaça en batent los Titans 18-12. Los Polets son tresens aprèp aver ganhat lo dèrbi de Sydney fàcia als Lapinons: 36-28. Las Làmias asseguran lor plaça dins lo primièr tablèu en ganhant a Manly 40-20.

Los Vaquièrs son anats batre los Dògols 44-6.

Los Tigres podián escapar a la darrièra plaça en batent las Anguialas, mas foguèt una detz e ueitena desfaita 26-60.

Aurem doncas los dos quarts de finala qualificatius entre Penrith e los Polets divendres e Melbourne-Làmias dissabte. Los venceires en mièja finala, los perdents en barratge.

Pels quarts de finala eliminatòris, los Vaquièrs reçaupràn Newcastle dissabte e los Dògols reçaupràn Manly dimenge. Los venceires en barratge e sason acabada pels perdents!