Aqueste divendres 5 de setembre, los calandrons de la mairala de l’escòla Calandreta Limosenca anèron al Domeni Robinson a Cornanèl per descobrir lo plaser d’amassar de polidas grapas de rasim plenas de chuc e de sucre. Armats de ferrats e cisèls, los pichons jonguèron la còla dels vendemiaires per la matinada. Quin bonaür de tastar lo rasim culhit al pè de vinha!

Aprèp una recòlta de las bonas, Audrey, la proprietària, nos ofriguèt un bon gostar e posquèrem celebrar l’anniversari del mai pichon de la classa que festejava sos 3 ans. Amb los vendemiaires, li cantèrem “lo polit anniversari” tradicional occitan.

La matinada s’acabèt per una passejada a l’entorn de la parcèla dins la mira de descobrir e observar los insèctes, esquiròls e aucèls presents sul domeni.

A l’ombra dels olivièrs, dinèron, puèi la tantossada se debanèt al ritme de jòcs e d’activitats de plena natura.

Los calandrons faguèron totes un grand solelh al “cossí vas” de fin de jornada e s’entornèron puèi amb l’enveja fòrta de revenir lèu.

Aquela sortida de rintrada marca lo començament del projècte annadièr de la classa “Natura e Descobèrtas”. Lo Domeni Robinson acceptèt d’aculhir los calandrons regularament per poder observar l’evolucion de la vinha e de la natura al fial dels meses e de las sasons.

Un mercé bèl a la còla tota del Domeni Robinson.

Melodia Bellanger
regenta de la classa

Jornalet a una seccion especifica sus l’escòla occitana. Nos agradariá fòrça que las escòlas, que sián de Calandretas o d’escòlas bilingüas, poguèsson emplenar elas meteissas aquesta seccion amb de nòvas, e que los quites escolans las poguèsson redigir en explicar los faches que fan l’actualitat dins cada escòla: una excursion culturala, la vesita d’una personalitat, una fèsta populara amb los parents, una competicion esportiva, etcetèra. Evidentament, las fotografias, los enregistraments o los imatges de vidèo seràn tras que benvenguts, se n’i a.

Se cada escòla nos manda quatre o cinc nòvas per an serem plan contents e satisfaches. Pensam que pòt èsser un bon ponch d’amassada per la comunautat educativa occitana, una iniciativa interessanta pels escolans e un esplech de socializacion lingüistica per las familhas dels escolans.

Esperam de poder comptar amb lo vòstre sosten, e esperam que Jornalet serà una aisina utila per las escòlas occitanas. Mandatz-nos las vòstras nòvas a info@jor…