Un ciutadan italian foguèt condemnat dimars passat per la justícia francesa a dos meses de preson amb sosta per aver pintat d’inscripcions islamofòbas sus qualques monuments d’Avinhon (Comtat Venaicin), dont lo Palais dels Papas, patrimòni mondial de l’UNÈSCO.
 
L’òme, de 30 ans e arquitècte de formacion, qualifiquèt son acte “d’irracional e d’impulsiu”. “Aviái una ràbia en ieu, ai agut besonh d’escriure aquelas causas”, çò diguèt davant lo tribunal correccional d’Avinhon, segon la traduccion en francés que fasiá l’interprèt. Neguèt que se tractèsse d’un acte politic e demandèt excusa. L’expèrt psiquatric descriguèt l’òme coma “intelligent” mas “depressiu”.
 
L’òme foguèt interpelat per la polícia municipala la nuèch de diluns a dimars, quand èra a tagar a la pintura roja divèrsas bastissas de la vila. “Aqueles faches son intolerables en rason dels supòrts causits, de sa profession d’arquitècte e dels prepauses inscriches, prepauses que son nauseabonds, islamofòbs”, çò estimèt lo ministèri public, que demandava per el dètz meses de preson amb sosta e 3000 èuros de multa.