La comunautat maòri de Nòva Zelanda celebrèt la dimenjada passada la montada sul tròn de lor novèla reina, Nga Wai Hono i te Po Paki. Succedís a son paire, lo rei Tuheitia, defuntat la setmana passada après 18 ans de regne, çò rapòrta Vilaweb. Malgrat que son ròtle siá mai que mai simbolic (coma lo país es membre del Commonwealth, lo monarca oficial de Nòva Zelanda es lo rei Carles III), aquela monarquia maòri es un pilar de la cultura e de l’identitat autoctònas dempuèi 1858. La reina novèla, de 27 ans, fa partida de la generacion Z, mas pòrta amb glòria lo moko kauae, un tatoatge facial tradicional.

Pasmens, aquela transicion se ten dins un contèxt politic tibat. Lo govèrn conservator de Christopher Luxon cèrca de metre fin a las politicas de discriminacion positiva al benefici dels maòris, aviant de tensions creissentas amb aquela comunautat, que representa mai o mens lo 17 % de la populacion. Lo govèrn a sustot abolit una agéncia de santat consagrada als maòris e vòl revisar los principis del Tractat de Waitangi, fondament de las revendicacions maòris en matèria de sobeiranetat.

Malgrat aqueles desfises, de nombroses maòris veson en Nga Wai Hono i te Po Paki un simbòl de novelum. Sa mescla de modernitat e de tradicion sembla de correspondre a las aspiracions dels joves maòris, majoritaris dins la populacion. Shane Jones, deputat maòri, declara que la novèla reina encarna “mai qu’un cambiament generacional”, en afirmant que poiriá afortir l’unitat e la resiliéncia dels maòris fàcia a l’adversitat politica.