La lei antiterrorista turca jutja que son delictuosas totas las activitats curdas, çò assegura l’activista Sebahat Tuncel dins una entrevista que la publica Argia en basco e Directa en catalan. L’infirmièra feminista curda, èx-deputada del Partit Democrata dels Pòbles (HDP) es estada relaxada dins l’afar de las protèstas de Kobanê: s’i jutgèt 108 personas restacadas als movements e partits curds acusats d’incitar a de manifestacions violentas en seguida de l’invasion de la vila de Kobanê per l’Estat Islamic. S’agissiá de criticar la passivitat de l’estat turc. Tuncel es estada relaxada, mas d’autres 24 activistas curds son estats condemnats a un total de mai de 400 ans de preson.

Dins aquela entrevista, l’infirmièra curda, que ja èra estada arrestada de per abans en 2006 e 2016, denóncia la repression continua viscuda pel pòble curd jos lo govèrn turc, mai que mai a travèrs de l’aplicacion de la Lei Antiterrorista. Aquela regulacion es estada utilizada per justificar la persecucion de milièrs de curds e d’activistas, fòrça d’eles encarcerats arbitràriament. A l’ora d’ara, i a mai de 10 000 presonièrs politics curds en Turquia, a qui sovent es refusada la libertat condicionala jos d’escampas injustificadas.

Tuncel soslinha l'importància de la lucha curda per la democracia e la libertat, en afirmant qu'una solucion pacifica al conflicte curd serà possibla sonque a travèrs lo dialòg e la negociacion. En despièch dels contratempses,ela a l'espèr d’un avenidor de convivéncia e de respècte dels dreches del pòble curd.