Tant qu’òm espèra la confirmacion de la grossesa de Carlòta Casiraghi, lo Principat de Mónegue a anonciat fin finala çò qu’èra un secret de polichinèla: la nòça d’Andrieu Casiraghi, filh de la princessa Carolina, amb la colombiana Tatiana Santo Domingo. Per mejan d’un comunicat brac, lo Palais Princièr de Mónegue precisa la data de la nòça que se debanarà lo 31 d’agost que ven, un an après que la princessa Carolina anoncièsse la promessa oficiala de maridatge.

Lo parelh an una relacion dempuèi nòu ans, e lo 21 de març passat nasquèt lor ainat Sasha. Après la nòça, l’enfanton serà lo tresen en la linha de succession del Principat de Mónegue, darrièr sa menina e son paire. Serà aital tant que lo prince Albèrt aja pas de filhs amb sa femna, l’èx-nadaira sud-africana Charlena Wittstock.
 
Per ara, la familha espèra un filh de Carlòta e del sieu promés, l’actor Gad Elmaleh. Lo parelh oficializèt lor relacion en març passat pendent lo Bal de la Ròsa, que Carolina i assistiguèt amb lo comediant 15 ans mai vièlh qu’ela.
 
Aquesta setmana que ven de passar, las informacions sus l’imminenta promessa de maridatge an corregut totes los rets socials. Del sieu sostat, l’AFP assegura que çò mai probable es que Carlòta e Elmaleh se mariden abans la fin de l’an, e que lèu lo palais monegasc ne faga un comunicat oficial.
 
La grossesa de Carlòta es pas estada confirmada pel Principat, mas sas fòtos en vestit de banh a l’illa de Capri o fan evident. Cal dire que la sòr d’Andrieu amaga pas son estat d’emprenhament avançat, mentre que si qu’o faguèt plan sa conhada Tatiana Santo Domingo.