Comença diluns a Tolosa lo Festenal Internacional de Cinèma Grolandés (FIFIGROT), un eveniment que, pendent tota la setmana, prepausa de cinèma satiric e de cultura alternativa que se desvolopa en Présipauté de Grolande  (Presipautat de Grolàndia), una nacion fictiva que, dempuèi 1992, fa una parodia de la societat francesa amb un estil irreverent.

Lo festenal es conegut per sa programacion de filmes inedits, d’avantprimièras e de raretats cinematograficas; e semond una larga gamma de genres que van de la comèdia absurda fins als dramas socials ponhents. Ongan, lo festenal se fa remarcar per presentar de filmes en occitan, dont especialament Triste ei lo cèu (Philippe Espinasse, 2018), Lo rei que s’escon (Damien Lagouardette, 2023), Shens Papèrs (Philippe Espinasse e Eva Cassagnet, 2016) e Tot en Chastenh (Maya Faure, 2024).

Pel primièr còp, lo festenal grolandés comprend d’activitats parallèlas coma d’obradors bailejats per Joan Carles Codèrs o la còla de Dètz, e encara per Estela, Simon, Anaêl e Nadja; d’exposicions, d’espectacles e de concèrts ont remarcam la preséncia de Courtial X Kogane e Cocanha. Se tendrà tanplan un rescontre amb los fondadors de Dètz TV, Amic Bedèl, Caroline Dufau, Lila Fraysse e Estela Blenet, que presentaràn una sanflorada giganta de projeccions de clips, de falsas publicitats, de road-trip, etc.

Lo GROVilatge, situat al pòrt de la Vigariá, serà lo ponch central d’amassada, ont se farà de projeccions a l’aire liure, d’activitats per totes los publics e la ceremònia de remesa de prèmis lo 22 de setembre, especialament lo guierdon de l’Anfòra d’Aur. L’Ostal d’Occitània aculhirà una bona partida del programa en lenga nòstra.

Per mai d’entresenhas: https://fifigrot.com