La NASA ven de confirmar l’existéncia d’un tresen camp energetic terrèstre, lo camp ambipolar, una ipotèsi ja prepausada fa 60 ans. Segon  Sci Tech Daily, aquel camp, principalament situat als pòls, afècta la dinamica de nòstra atmosfèra en l’espandissent delà los limits gravitacionals. Malgrat que siá feble, lo camp ambipolar accelèra los ions d’idrogèn a de velocitats supersonicas e influéncia tanben de particulas mai pesugas, coma los ions d’oxigèn. Aquela descobèrta modifica nòstra compreneson de las interaccions entre la Tèrra e son environament espacial.

L’istòria d’aquela descobèrta remonta a 1968, quand las primièras exploracions espacialas observèron un vent de particulas a s’escapar cap a l’espaci, en suggerissent l’existéncia d’aquel camp amagat. Pasmens, es pas qu’en mai de 2022, pendent la mission Endurance, qu’una confirmacion dirècta foguèt obtenguda. Aquela mission, menada amb una fusada suborbitala, detectèt un diferencial electric que confirmava l’ipotèsi del camp ambipolar.

Aquela descobèrta dobrís de novèlas perspectivas per l’estudi de la Tèrra e de las autras planetas amb una atmosfèra. Lo camp ambipolar poiriá aver jogat un ròtle crucial dins la formacion de nòstra atmosfèra e la proteccion de la vida sus la planeta. Las recèrcas futuras temptaràn de respondre a las nombrosas questions que subsistisson, sustot sus son influéncia dins l’evolucion de la planeta al fil del temps.