Quand dintrèron sus la pelena aqueste dissabte, los catalans sabián que poirián pas pus doblar St Helens venceire de Castleford: 40-4, ni mai Salfòrd, qu’èra anat passar un 58-4 a Hull FC. Per contra, podián esperar d’èsser encara en mesura de doblar Leigh batut sus sa pelena per Hul KR 0-24 e Leeds batut a Wigan 0-38 . E se podián melhorar la diferéncia de punts seriá encara melhor…

Mas fàcia als darrièrs, Londres, foguèt plan mai complicat. Los catalans jogavan amb un parelh de mièges que tornavan de nafradura: Abdull e Tomkins. Los angleses menavan 8-0 a la pausa. Lo pilar Bosquet desliurava la palma sus un placatge e permetiá a Wallace de marcar. Morgue tustava a seguir e Romano puntava l’ensag Amb las doas transformacions de Morgue, victòria estequida dels Sang e Aur: 12-8.

Quand jogaràn dissabte la darrièra partida de la sason regulara cò d’Hull FC, los Sang e Aur saupràn s’an pas res mai a jogar o s’una victòria lor permetriá d’arrancar la seisena plaça qualificativa. Lor i cal comptar sus las desfaitas divendres a l’encòp de Leeds a Hull KR e de Leigh fàcia a St Helens.

Tolosa sus sa lançada

En Championship, dissabte a Ernèst Wallon, lo Tolosa Olimpic a batut un concurrent per la segonda plaça, Halifax, sus la marca de 38-18.

NRL: Melbourne e Penrith en mièja finala

Las pelhòfas an començat en NRL.

Per las partidas qualificativas, fàcia als Polets, Penrith fa la diferéncia dins lo primièr temps e ganha 30-10. Fàcia a las Làmias, Melbourne accelèra dins lo segond temps e ganha 37-10. Penrith e Melbourne son qualificats per las mièjas finalas.

Dins las partidas eliminatòrias, los Vaquièrs escartan Newcastle 28-16 e Manly va ganhar cò dels Dògols de Canterbury 24-22.

Aquesta setmana, se jogaràn los barratges: Làmias-Vaquièrs (divendres) e Polets-Manly (dissabte).

Represa del Super-XIII

Lo campionat de França d’Elèit 1 se sona ara Super-XIII. Cinc partidas son al programa de la primièra jornada:

• dissabte 21: lo campion Carcassona reçauprà lo nòuvengut, Vilafranca de Roergue; e tanben Avinhon/Sent Gaudenç; Dragonets-Lesinhan; Vilanòva-Limós.

• dimenge 22: Pià-Albi.

Tolosa Elèit esperarà lo 28 de setembre per entamenar la sason a Lesinhan.

Lo club de Carcassona vei espelir una còlha organizada de sostens qu’an pres un nom occitan: los Furioses.