L’analisi d’escapolons biologics umans, tals coma la sang, l’urina e lo lach mairal, a revelat la contaminacion de 3601 compausats quimics sortits d’embalatges, de procèsses de produccion e d’autres materials en contacte amb los aliments. Totplen d’aquelas substàncias son consideradas nocivas per la santat.

Un novèl estudi aprigondit a revelat la contaminacion de 3601 substàncias quimicas, sortidas dels embalatges alimentaris e d’autres materials en contacte amb los aliments, dins d’escapolons biologics umans, tals coma la sang, l’urina e lo lach mairal, çò rapòrta Fanpage. Aqueles compausats, sovent presents dins los embalatges, las ustensilhas de cosina e las maquinas de transformacion alimentària, pòdon migrar dins los aliments. Demest las substàncias identificadas figuran de compausats perilhoses coma los ftalats, lo bisfenòl A e los PFAS, ja associats a de risques per la santat tals coma lo càncer, l’autisme e las perturbacions endocrinianas.

L’estudi es estat realizat per un grop de cercaires internacionals dirigit per de scientifics soïsses de la Food Packaging Forum Foundation de Zuric. An utilizat de donadas en provenença de divèrses programas de biosusvelhança e de basas de donadas suls metabolòmas e expausòmas per establir un ligam entre las substàncias quimicas en contacte amb los aliments e lor repercussion sus la santat umana. Los resultats mòstran que de nombrosas substàncias fins alara negligidas an de far l’objècte d’una vigilància acrescuda.

Los autors de l’estudi cridan a una revision de las reglamentacions suls embalatges alimentaris per tal de reduire la contaminacion d’aqueles compausats nocius. Espèran que lors descobèrtas incitaràn las autoritats a adoptar d’alternativas mai seguras.

Podètz consultar los detalhs de la recèrca aicí.