La Tèrra se prepara per aculhir una novèla “miniluna” per un cort periòde de dos meses. Aquel asteroïd, sonat 2024 PT5, foguèt descobèrt en agost gràcias al sistèma d’alèrta ATLAS (Asteroid Terrestrial-impact Last Alert System) en Africa del Sud. De mai o mens 10 mètres de diamètre, serà per un temps capturat per la gravetat terrèstra, en venent aital un satellit natural efemèr entre lo dimenge 29 de setembre venent e lo 25 de novembre de 2024 (orbitarà a l’entorn de la Tèrra pendent 56,6 jorns exactament). Los resultats de l’estudi son estats publicats dins Research Notes of the AAs.

Per que una tala situacion se produga, cal qu’un còrs s’apròche pro près de la Tèrra, çò es a una distància de mai o mens 4,5 milions de quilomètres, a una velocitat pro bassa, mai o mens 3540 km/h, per èsser atrach per nòstra planeta.

Pasmens, serà impossible de l’observar a uèlh nud, perque la luminositat de 2024 PT5 serà tròp febla per èsser vesidoira (aurà una magnitud absoluda de 27,6), quitament amb de telescòpis amators.

Aquel fenomèn de “miniluna” es pas novèl per la Tèrra. Un asteroïde apelat 2020 CD3 foguèt ligat a la Tèrra pendent mantuna annada abans de quitar l’orbita de nòstra planeta en 2020, e un autre, nommat 2022 NX1, venguèt una miniluna terrèstra en 1981 e en 2022, e tornarà en 2051. En 2006, un autre pichon asteroïde foguèt capturat e orbitèt a l’entorn de nòstra planeta pendent aperaquí un an. En mai d’aquò, 2024 PT5 poiriá tornar dins nòstre vesinatge espacial en genièr de 2025, puèi en 2055.

Los scientifics espanhòls Carlos e Raúl de la Fuente Marcos, de l’Universitat Complutense de Madrid, an seguit la trajectòria d’aquel asteroïde e estiman qu’aperten probablament a la familha dels asteroïdes Arjuna, caracterizats per una orbita similara a la de la Tèrra. Aquela captura temporària es lo resultat de l’atraccion gravitacionala terrèstra, mas l’asteroïde finirà que retrobarà sa trajectòria a l’entorn del Solelh, après un cort sojorn dins nòstra orbita.

La Tierra adoptará temporalmente una mini luna.

El 29 de septiembre el asteroide 2024 PT5, de 10 metros de diámetro, será capturado por la gravedad de la Tierra. Tras 56 días el asteroide volverá a orbitar alrededor del Sol.

📷:@tony873004pic.twitter.com/TALpwjfYPs

— Space Nøsey (@SpaceNosey) September 19, 2024