La victòria de Leigh 18-12 fàcia a Saint Helens divendres de ser privava definitivament los catalans de lors darrièrs e pichons espèrs de qualificacion.

Dissabte, a Hull FC, clavèron lor sason per una victòria 24-4 que los fa acabar a la mai marrida plaça: la setena, alara que i a sonque sièis qualificats. Son a egalitat de punts amb St Helens, mas los angleses an una plan melhora diferéncia de punts, + 208, alara que los catalans s’acontentan d ‘un + 47!

Demòra d ‘esperar que los franceses de la formacion catalana garden pro de vam per defendre las colors francesas dins lo torneg europèu qualificatiu per la Copa del Mond venenta. Puèi, va caler doblidar lèu aquesta sason pietadosa e ne tirar las leiçons per atacar d ‘un bon pè la sason 2025 amb un efectiu largament renovelat: 8 partenças anonciadas.

Wigan e Hull KR son qualificats per las mièjas finalas. En barratge, Warrington reçauprà St Helens e Leigh se desplaçarà a Salford. Londres acaba la competicion en darrièra posicion.

Championship : Tolosa se revelha dins lo segond temps

Dissabte, a Widnes, lo Tolosa Olimpic es menat 12-0 a la pausa, mas s ‘impausa 18-12. Aqueste dissabte, recepcion de Batley a Ernèst Wallon per confirmar la segonda plaça.

NRL : Penrith-Cronulla e Melbourne-Polets en mièjas finalas

En Austràlia, se jogavan las partidas de barratge. Divendres, fàcia als Vaquièrs, Cronulla marquèt 4 ensages abans la pausa (24-0) e tenguèt còp al retorn advèrs (victòria: 26-18).

Dissabte, Los Polets dominèron aisidament Manly: 40-16. Atal, son los primièrs quatre del classament que son qualificats. Las mièjas finalas opausaràn divendres Penrith e Cronulla, puèi dissabte, Melbourne e los Polets.

Super-XIII : nòtas saladas, ròda crebada e pluèja!

La debuta de la tardor marca la represa del campionat, vengut Super-XIII amb la participacion de onze formacions.

Lo campion (Carcassona) pren aisidament lo dessús sus Vilafranca de Roergue 52-6; la formacion roergassa es dins l ‘espèra de l ‘arribada de quatre australians per plan figurar dins la competicion. St Gaudenç fa pas dins la mièja mesura en Avinhon e ganha 58-18. A Sant Estève, Lesinhan es menat 22-0, torna a egalitat mas pèrd: 22-30. Tres ensages catalans son marcats pels dos quinzistas recrutats: Darrelatour (un; US Carcassona) e Ben Lam (dos; Montpelhièr).

La partida Vilanòva-Limós es retardada de tres quarts d ‘ora aprèp la crevason d ‘una ròda de l ‘autocarri audenc. Lucas Vernhiòl, de retorn de Limós, dobrís la marca pels Leopards. Delteilh, arribat de Vilanòva, li replica e, fin finala, Limós ganha 28-14.

Dimenge, a Pià, a la pausa, los albigeses menavan 10-6 mas l ‘arbitre arrèsta la partida : la pluèja a transformat lo terren catalan en piscina!

Al programa de la segonda jornada:

• dissabte 28: Lesinhan-Tolosa; Albi-Avinhon ; St Gaudenç-Vilanòva.

• dimenge 29: Limós-Dragonets; Vilafranca-Pià.