Las Jornadas Europèas del Patrimòni son estadas marcadas per l’arribada al castèl de Biron (Brageigarés) de replicas impressionantas d’estatuas peiregòrdas de la Renaissença, expausadas fins alara al Musèu Metropolitan d’Art (MET) de Nòva York. Segon TV5 Monde, aqueles facsimiles, representant una “Mesa al tombèl del Crist” dominada per d’angelòts, son estats installats dins la capèla del castèl, un dels màgers de Peiregòrd.

Realizadas gràcias a de tecnologias de poncha utilizadas per la reproduccion de la cauna de Las Caus, aquelas còpias son remarcablas per lor fidelitat a las òbras originalas. En 1957, una demanda similara foguèt refusada a causa dels risques per las estatuas. Uèi, d’inventaris fotogrametrics e de maquinas 3D permeton de crear de replicas en resina qu’imiten perfièchament la pèira e sos detalhs per un budget de 350 000 èuros.

Griffith Mann, conservator al MET, a saludat la qualitat “impressionanta” d’aquelas còpias, en soslinhant la precision dins las colors e los grafitis. Aquelas replicas permeton aital als vesitaires del castèl de tornar descobrir aqueles tresaurs dins lor contèxt d’origina. Coma o explica André Barbé, director general de Semitour Peiregòrd, “los originals son plan mai conservats al MET, mas lo facsimile ofrís al public la possibilitat d’admirar l’òbra.”

Lo castèl de Biron contunha aital d’atraire los vesitaires, en aculhissent mai de 60 000 personas en 2023.