Actualitats
La presidenta novèla de Mexic empacha la preséncia del rei d’Espanha a sa ceremònia d’investidura
Lo monarca espanhòl respondèt pas a la letra enviada pel dirigent sortent del país, Andrés Manuel López Obrador, qu’exigissiá d’excusas publicas pel passat colonial
Tèxte legit
Claudia Sheinbaum, la presidenta elegida de Mexic, ven d'exprimir son malcontentament envèrs lo rei d’Espanha, Felip VI, çò rapòrta Vilaweb. A decidit de lo convidar pas a sa ceremònia d’investidura, prevista lo 1r d’octòbre, pr'amor qu'a pas jamai respondut a una letra enviada pel president sortent, Andrés Manuel López Obrador. Dins aquela missiva, datada de març de 2019, López Obrador demandava d’excusas publicas de l’estat espanhòl per las injustícias causadas pendent lo periòde colonial, en prevision del bicentennari de l’independéncia mexicana.
Sheinbaum soslinha que la letra foguèt ignorada, çò que, segon ela, es contrari a las nòrmas diplomaticas. Critica tanben la filtracion de son contengut a la premsa e la publicacion d’un comunicat pel ministèri espanhòl dels afars estrangièrs, que rebutava lo fons de la letra. Pasmens, Sheinbaum ramenta l’importància de las relacions bilateralas entre Mexic e Espanha, marcadas per de ligams economics e culturals fòrts.
La presidenta elegida plaideja per un novèl apròchi istoric que favorizariá una relacion respectuosa e constructiva entre los dos estats, en recordant la generositat mexicana de envèrs los refugiats republicans de la guèrra civila espanhòla. Insistís sul fach que la reconeissença de las identitats e dels grèuges istorics poiriá enriquir aquela relacion, en transformant aital un passat dolorós en la basa d’un avenidor prospèr.
Sobre el comunicado del 24 de septiembre del Ministerio de Asuntos Exteriores, Unión Europea y Cooperación de España. pic.twitter.com/K1rFImrO4p
— Dra. Claudia Sheinbaum (@Claudiashein) September 25, 2024
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
Un descendent d'envaseires espanhols, Manuel Lopez Obrador (que sembla pas un nom aztèc, iaqui o mayà !!) que demanda d'excusas publicas de l'estat espanhols per las injusticias fachas als indians per sos reires a-n-el que venguèron d'Espanha, coma per exemple los Lopez Obrador ? E ceresa sus la coca, aquesta demanda fantasierosa es facha tornamai per una Claudia Sheinbaum qu'aparten tanben a la colonizacion europenca que senhorèja totjorn suls estatjants originals del Mexic ? Om nada en plena absurditat !
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari