Es prèsta per la difusion la segonda sason de Ton-Ton. Lenga e musica per Occitània, lo programa produsit per RBE-TV e Unione Montana Val Estura que, atravèrs li ajuts de musicaires de la scèna musicala occitana das Valadas e dal terraire piemontés e de l’autre caire de l’aigavèrs, nos dona ocasion d’escotar e de prefondir las diferentas faiçons d’interpretar, produire e far “musica occitana” e li sius rapòrts emb la lenga.

En onda mèlcres 2/10 as 21h, sus lo canal 87 RBE-TV (províncias de Turin, Coni e Asti) e en streaming sus rbe.it, lo primier novèl episòdi que vearè invitats lo grop Lo Pitakass en dirècte e “Papet J” dai Massilia Sound System en connexion web.

Lo viatge entre lenga e música, menat da Stefano Degioanni, vòtz e frontman dai Lo Seriòl, anarè pi, emb cadéncia setmaniera, per autri 5 mèlcres en companhia de: Bogianen + MC's du Midi (9/10), Dino Tron + Loddo (La Talvera) (16/10), L’Escabòt + Alidé Sans (23/10), La Pèiro Douso + Cocanha (30/10), Gaj Saber + Rodin (06/11).

Après sarè possible vèire tuchi li episòdis sus lo canal YouTube de RBE ràdio e TV.

Decò aquest’an li episòdis son estats enregistrats en Val Estura, en lòc d’agregacion, e istoricament liats a experiéncias musicalas: al renommat òste dal Centro Fondo (conoishut pustòst coma “lo CF”) a Aison, que avia ja donat la plaça a tuchi li 6 episòdis dal 2023, s’es ajontat lo Revelin Bistròt (renommat coma “Lo Revelin”), a Vinai, istorica sala de bal dins li ans 1960, lòc de rescontres e convivialitat, da gaire renovelat e redubèrt al públic.

Li episòdis son estats filmats emb lo públic “en sala”, invitat a èstre part de la producion dal programa. Aquesta modalitat participativa a fach en manièra que los enregistraments donèsson ocasion de rescontre e eschambi per la comunitat. La nòva de la segonda edicion de “Ton-Ton” es la rubrica curaa da l’etnolingüista Andrea Celauro: chascun dai 6 episòdis sarè introdusit da un moment de prefondiment dedicat a una paraula clau occitana particularament significativa a respècte dai subjèctes trobats ensems ai invitats.

Ton-ton. Lenga e musica per Occitània es lo programa musical occitan televisiu que per la segonda edicion es realizat emb l’ajut de la “Presidenza del Consiglio dei ministri – Dipartimento per gli affari regionali e le autonomie” gràcias ai sòus de la Lei 482/99 (“Norme in materia di tutela della minoranze linguistiche storiche”), dins lo projècte “Sus las draias de la lenga occitana” emb lo coordinament de lo burèu de cultura de l’Unione Montana Val Estura, la direction artística de Stefano Degioanni e la producion de RBE TV e Vibes Video, en collaboracion emb lo Bar del Centro Fondo d’Aison e lo Revelin Bistròt de Vinai.

Per informacions: cultura@vallestura.cn.it