Dijaus passat, 26 de seteme, eth Congrès des Deputats espanhòu acuelhec era commemoracion deth Dia Europèu des Lengües, un acte solemne qu’amassèc as presidents e representants des diuèrses acadèmies lingüistiques der estat espanhòu. Era jornada metec en valor eth patrimòni lingüistic d’Espanha e refortic era defensa e promocion dera diuersitat lingüistica en encastre europèu.

Un des moments mès remercadi dera jornada siguec era intervencion de Jèp de Montoya, president der Institut d'Estudis Aranesi - Acadèmia Aranesa dera Lengua Occitana. Montoya metec en evidéncia es rèptes e es oportunitats qu’afronte er occitan en un contèxt culturau e politic que cada còp avalore mès era diuersitat lingüistica.

Delà dera Acadèmia Aranesa, er acte compdèc damb era participacion d’ importants representants dera Reiau Acadèmia Espanhòla, des dues acadèmies lingüistiques deth catalan e tanplan des der aragonés, er asturian, eth basco e eth galèc. Toti participèren en ua taula redona a on se debatec eth present e er avier deth plurilingüisme en estat espanhòu. Era preséncia dera Acadèmia Aranesa siguec mès que mès significativa, pr’amor que dèc votz ara lengua nòsta, era mès petita der estat espanhòu.

Era celebracion se clauèc damb un concèrt dera cantadora Rozalén en basco, castelhan, catalan e galèc.

Rozalen euskaraz Kongresuan, Xabier Leteren Xalbadorren heriotzean.
Rozalen canta en el Congreso español en euskera, Xalbadorren heriotzean, "la muerte de Xalbador" de Xabier Lete.
Enorme respeto y emoción @RozalenMusicpic.twitter.com/3kMBGFKB9f

— Donostia Bai 🌹 (@Erramun2014) September 26, 2024