Finala logica e aficha de primièra en NRL aqueste dimenge 6 d’octobre entre Penrith, ganhant de las 3 edicions passadas, e Melbourne, primadièr de la sason.

Divendres, Melbourne eliminèt los Polets 48-18 e dissabte Penrith se mostrèt plan mai fòrt que las Làmias e faguèt la diferéncia dins lo segond temps: 26-6.

La finala feminina opausarà las Làmias (venceiras de Brisbane en mièja finala: 14-0) e las Polas de Sydney qu’an eliminat Newcastle 25-16.

Leigh e Warrington en mièjafinala

En Superliga, se jogavan las partidas de barratge. Divendres, a Salford, Leigh fa la diferéncia dins lo segond temps:14-6.Dissabte, sus sa pelena, Warrington es menat 4-16 per St Helens, puèi pren l’avantatge 22-16. St Helens egaliza sus la còrna . Al punt en aur, la segonda temptativa de tombat de George Wiliams es la bona e Warrington se qualifica 23-22!.

En mièja finala, Warrington se desplaçarà a Hull KR divendres e, dissabte, Wigan reçauprà Leigh.

Tolosa acaba segond

En Championship, los tolosans fan pas de detalh amb Batley: victòria 64-16.

En mièja finala, lo dimenge 13 d’octòbre, a 5 oras del vèspre, los occitans reçaupràn lo venceire del barratge entre Bradford e Featherstone.

Super-XIII: lo dimenge dels punts en aur

Per la segonda jornada del campionat, dissabte, Lesinhan batiá sens dificultat Tolosa 36-10. Avinhon prepausava una brava resisténcia a Albi: desfaita 16-30, e Vilanòva anava ganhar a St Gaudenç: 18-16.

Las doas partidas de dimenge foguèron plan disputadas. La decision se faguèt al punt en aur amb las victòrias de Limós fàcia als Dragonets 37-36 e de Vilafranca sus Pià: 27-26!

Al programa de la tresena jornada:

• dissabte: Vilanòva-Avinhon, Tolosa-Limós, Vilafranca-Albi

• dimenge: Dragonets-St Gaudenç e lo dèrbi audenc Carcassona-Lesinhan.