Julian Assange, lo fondador de WikiLeaks, denóncia la persecucion dont foguèt victima de part dels Estats Units per aver publicat d’informacions d’interès public, çò rapòrta Vilaweb. Pendent sa primièra aparicion publica dempuèi sa liberacion en junh, critiquèt tanben los païses europèus per lor complicitat amb Washington, en permetent aital de violacions dels dreches umans. “Soi liure perque me soi declarat colpable de far de jornalisme, e non pas perque lo sistèma de garentidas aja foncionat”, çò declarèt amb amarum.

Assange evoquèt la “campanha de repression internacionala de la CIA” qu’a per mira de reduire al silenci las voses dissidentas e de criminalizar lo jornalisme. Cridèt a manténer “lo lum de la libertat” e a garentir que la recèrca de la vertat contunhe, en soslinhant que los interèsses d’una minoritat deurián pas estofar las voses de la majoritat.

En responsa a las questions, Assange partegèt sas dificultats personalas a se tornar adaptar a la vida après d’annadas d’isolament. “Torni venir paire de mainatges que cresquèron sens ieu; torni èsser un espós, e mai deure tractar amb una sògra”, çò badinèt, en reconeissent pasmens l’impacte que l’isolament aviá agut sus el. Admetèt tanben qu’èra estat ninòi de creire que la lei lo protegiriá, s’esperant a de represalhas, mas pas d’una tala amplor.

En 2010, Assange publiquèt de milièrs de documents classificats del Departament d’Estat dels Estats Units ligats a de conflictes coma la guèrra d’Afganistan. Foguèt la filtracion mai granda dempuèi los “papièrs del Pentàgon“, çò que conduguèt a son exili al Reialme Unit e a un asil politic en 2012. Après èsser estat encarcerat a Belmarsh en 2019, a fin finala acceptat un acòrdi amb las autoritats americanas, en evitant l’extradicion e en essent liberat après aver purgat cinc ans de preson.