Lo govèrn israelian a declarat lo secretari general de l’Organizacion de las Nacions Unidas, António Guterres, persona non grata, e li enebís d’intrar dins lo país. Aquò es estat anonciat pel ministre dels afars estrangièrs israelian, Israël Katz, qu’a afirmat que Guterres aviá pas volgut condemnar “de faiçon clara e sens equivòca” l’ataca de missils d’Iran contra Israèl.

Segon Katz, Guterres sosten los “terroristas, violaires e assassins de l’Hamas, de l’Hizbullah, dels huthis, e ara d’Iran”. “Israèl contunharà de defendre sos ciutadans e sa dignitat nacionala, amb o sens António Guterres”, çò assolida lo ministre de l’estat ebrieu dins un messatge sus X (èx-Twitter).

Lo govèrn israelian a criticat publicament Guterres mantun còp. Considèra d’ara enlà inacceptable lo comunicat emés pauc après la debuta de l’ataca iraniana contra Israèl.

Lo ministèri israelian dels afars estrangièrs afirma que lo comunicat a pas mençonat Iran ni condemnat clarament sa “grèva agression”, e estima que Guterres, doncas, es pas pus lo benvengut.

Article tirat e revirat de Vilaweb