Lo licèu Clemenceau de Montpelhièr ven de festejar l’inauguracion de la senhalizacion bilingua en francés e en occitan, un projècte que l’anoncièt Carole Delga, presidenta de la region, en setembre de 2023, çò rapòrta l’ensenhaira Magalí Fraisse sus LinkedIn. Aquela iniciativa fa partida de la renovacion dels bastiments de l’escòla e cèrca de refortir l'identitat lingüistica e culturala de l’airal.

Las classas de la primièra annada, qu’ofrisson la matèria facultativa e l’especialitat en “Lenga estrangièra e regionala, literatura e cultura, occitan”, an manifestat lor satisfaccion per aquela nòva senhalizacion. Los escolans, conjonchament amb lor professor, participèron activament a la traduccion dels panèls pendent lor segonda annada d’occitan, çò que rend aquel projècte encara mai significatiu per eles.

Aquela senhaletica s’intègra al projècte de camin vegetal “Verd Paradís”, segon l’òbra famosa de Max Roqueta, e marca un pas important cap a una escòla mai inclusiva que respècte la diversitat lingüistica. La ciutat escolara Clemenceau se posiciona aital coma un exemple de seguir dins la promocion de l’occitan e de sa visibilitat dins lo domeni educatiu.