Es partida l’edicion 2024 del Festenal Occitània, que presenta ongan a Tolosa una programacion rica e variada amb mai de vint eveniments. L’edicion d’ongan cèrca de far descobrir çò de melhor de la cultura occitana en literatura, teatre, musica e fòrça mai. Lo festenal comencèt lo 21 de setembre al meteis moment que las Jornadas Europèas del Patrimòni al Musèu de Sant Ramon, e s’esperlongarà pendent tot lo mes d’octòbre e fins al començament de novembre.

Lo programa prepausa d'iniciacions a la lenga occitana, de contes, de musica en dirècte e de visitas guidadas. A mai, la Comèdia Occitana Tolzana presentarà l'òbra Embrolhs a la Palanca, e lo famós Florant Mercadier ofrirà sa non mens famosa pèça L’Occitanie pour les nuls.

La literatura i a tanplan un ròtle màger amb mantuna presentacion de libres, dont  Marcela Delpastre, Miquèla Stenta e mai Eric Fraj que semond son darrièr libre-CD Parle a un pòble ont canta de poèmas de Robèrt Lafont.

Lo festenal compren tanben de concèrts amb d’artistas coma Rodín e Louie Z, aital coma de fèstas tradicionalas e d’activitats comunautàrias. Lo ponch final del fesenal serà un concèrt de De la Crau e Dus au Casau lo 2 de novembre.

Per mai de detalhs sus la programacion, vesitatz lo sit de l’IEO 31 e sos rets socials.