La Cort Administrativa de Fort-de-France anullèt dijòus una deliberacion de la Collectivitat Territoriala de Martinica (CTM) de 2023 que reconeissiá lo creòl coma lenga cooficiala de l’illa. La decision es estada presa en seguida d’un recors que lo presentèt lo prefècte Jean-Christophe Bouvier.

Segon la senténcia, l’article 1r de la resolucion adoptada lo 25 de mai de 2023, qu’establiguèt lo creòl coma lenga oficiala al meteis nivèl que lo francés, es estat declarat nul. Aquela decision es emesa après que, en novembre de 2023, la Cort d’Apelacion administrativa de Bordèu suspendèt temporàriament la cooficialitat, en pretendent que l’usatge del francés es obligatòri per las institucions publicas, segon l’article 2 de la Constitucion francesa e la lei de 1994 sus l’usatge de la lenga francesa.

Los magistrats an soslinhat que l’anullacion tòca pas lo drech dels ciutadans d’emplegar lo creòl cada jorn o son estatut de lenga regionala reconeguda. Pasmens, la CTM a ja anonciada son intencion de menar l’afar al Conselh d’Estat per far apelacion de la decision.

Aqueste debat suls dreches lingüistics se ten a un moment de revendicacions d’identitat, pauc après lo 175n anniversari de l’abolicion de l’esclavatge en Martinica.