Lo sector del cafè travèrsa una crisi de produccion sens precedent. Segon Vilaweb, de costuma Euròpa dispausa de resèrvas sufisentas per mai o mens quinze setmanas, mas a l’ora d’ara aqueles estòcs cobrisson pas que sièis setmanas. Mantun factor contribuís a aquela situacion, sustot lo cambiament climatic, las marridas recòltas a l’escala mondiala e las nòvas regulacions europèas qu’an per mira de luchar contra la desforestacion. Los darrièrs meses, lo prètz del cafè a ja aumentat, e es pas exclús que contunhe d’escalar.

La pojada dels prèses pòt pas èsser atribuida a un sol factor. Lo cafè, tot coma lo cacau, es cultivat a l’aire liure dins de regions tropicalas, e es estat fòrça tocat per de condicions meteorologicas extrèmas, talas coma de secadas perlongadas e de pluèjas torrencialas. Los païses productors clau coma Brasil e Vietnam son particularament afectats, segon lo darrièr rapòrt de l’Organizacion Internacionala del Cafè (OIC).

D’autres productors, coma Colómbia, los païses d’America Centrala o encara Indonesia, an tanben patidas de marridas recòltas, rendent l’excedent mondial quasi inexistent. En particular, la varietat robusta, largament utilizada dins las mesclas de cafè esprèsso e instantanèu, vei sa produccion demesir mentre que la demanda aumenta fòrça, sustot a causa de l’auça persistenta dels prèses de l’arabica las darrièras doas annadas.

En Euròpa, una nòva reglamentacion de l’Union Europèa contra la desforestacion, adoptada en decembre de 2022, complica encara mai la situacion. Aquel reglament exigís de demostrar que los produches importats sián pas ligats a la desforestacion, çò que se poiriá averar malaisit per fòrça pichons productors de cafè dins los païses en desvolopament.