La finala de la Superliga opausarà dissabte de ser a Old Traford, Hull KR e Wigan.

Divendres de ser, Hull KR, primièr al classament, recebiá Warrington. Los Barbarosses marcavan dos ensages dins lo primièr temps e Mickey Lewis transformava lo segond. Warrington ensagèt de faire lo retard, marquèt plan dos ensages mas foguèron pas transformats. Passèron de longs moments dins los 20 mètres dels locals sens capitar d’enganar la defensa roja. Hull KR ganha doncas 10-8 e jogarà la primièra finala de Superliga de son istòria.

Mas, fàcia a eles, traparà un club acostumat de las finalas e dels trofèus!

Dissabte, es sens cap de dificultat que Wigan eliminèt Leigh 38-0.

En Championship, Bradford elimina Featherstone 25-12 e York elimina Widnes 27-10. Dimenge, pel compte de las mièjas finalas, Wakefield reçauprà York e, a 5 oras del vèspre, a Ernèst Wallon, lo TO afrontarà Bradford.

NRL: quatre campionats de tira per Penrith!

En Austràlia, a Sydney, se jogavan las finalas dels campionats. Cò de las femeninas, las Polas de Sydney menavan 24-0 a la pausa. Dins lo segond temps, las Làmias de Cronulla ensagèron de faire lor retard mas Sydney gardèt l’avantatge: 32-28.

Cò dels òmes, Melbourne marquèt d’en primièr: un ensag del talonaire Grant al ras del tengut, mas a la pausa, mercé a dos ensages e una transformacion, Penrith menava 10-6. Dins lo segond temps, Melbourne crei de marcar, mas l’ensag es refusat al vidèo. Penrith confirma sa victòria per un novèl ensag: 14-6. Las Pantèras ganhan atal lor quatren campionat en seguida!

Super-XIII: Limós en cap de fila

La tresena jornada del Super-XIII se dobriguèt dissabte per una tresena victòria de Limós qu’empòrta la victòria del costat de Tolosa 25-12. Atal, los Grizzlies prenon lo cap de la competicion. Vilanòva bat Avinhon 26-18.

Dimenge, Albi va ganhar a Vilafranca 22-6; a Sant Estève, los Dragonets tenon los Orses de St Gaudenç a distància: 22-6 a la pausa e 38-18 al final.

A Domèc, se jogava lo dèrbi Carcassona-Lesinhan: los Canaris èran mai inspirats e mai desgordits que los Molinièrs. A la pausa, los locals menavan 20-12; dins lo segond temps, ajustèron tres ensages, una transformacion e un tombat per s’impausar aprèp qualques moments de “granda intensitat” .

L’entamenada en Elèit 2

En Elèit 2, la competicion repreniá. Dissabte, Illa se mostrava sens pietat per Tonens: victòria 62-10.

Dimenge, sus son èrba, lo nòuvengut, Pàmias, èra menat per Selon 18-4 a la pausa, puèi 24-4, mas ganhava: 30-24! L’autre nòuvengut, Realmont, recebiá Palau, menava 6-0 a la pausa, mas perdiá: 16-38. Carpentràs va batre l’Escura al punt en aur: 23-22.

Los U19 en virada en Austràlia

L’esquipa de França dels U19 se trapa en Austràlia. Dins la primièra partida, fàcia als Polets, tenguèron còp dins lo primièr temps (4-8), mas foguèron despassats a la represa: desfaita 4-4.

Aprèp èsser anats véser los cangorós, rescontrèron puèi la formacion dels liceans del Rouse Hill RhinosCross College que capitèron de batre: 28-24.

Lor i demòra de jogar aqueste dimars contra l’esquipa australiana escolara (veire lo compte Facebook de l’FFR13).