Dissabte passat, a Garait (Nauta Marcha) se masseren entre 2000 e 2500 personas per defendre los bòscs lemosins contra dos grands projèctes que son l’agrandiment de la sejariá Farges Bois aus Gletons e la construccion de ‘na usina de granulats Biosyl a Garait.

Quilhs projèctes son considerats per los opausants coma desmesurats e d’èsser un dangier per los bòscs lemosins e la biodiversitat en generau.

Eran presents daus representants de Canopée (plan actius dins quela opausicion), Greenpeace, França Natura Environament, de partits politics coma EELV, LFI, l’NPA, o daus sindicats coma la Confederacion Païsana, lo Sindicat de la Montanha Lemosina, la CGT, l’FSU, Solidaris (que SNUPFEN Forests)… daus elegits locaus e de professionaus de la forest.

Era organizada ‘na permenada naturalista davant lo site de Biosyl, de las conferéncias, e la manifestacion que se faguet tras las charrieras de la prumiera vila de Cruesa, en se plantar davant la prefectura, puèi davant la mairariá.

Lo cortegi era festiu e familiau, emplit de pitits, de colors e de chants. Chaminavan entre la gent la mascòta per lo vivent, un grapaud Bombina variegata, e un dragon que simbolizava los projèctes. Se podiá legir sus la bandieras e las pancardas “Biosyl = Biocidi”, “la filiera bòsc a un avenir sens megaprojèctes”, “Alta a las còpas rasas”...

Apres daus lanç de granulats au dessús dau portau de la Prefectura, e doas interpelacions per la polícia, los manifestants pogueren auvir parlar los organizaires, daus elegits locaus e mai Marie Toussaint d’EELV e Mathilde Panot d’LFI.

Lo cortegi partiguet apres la liberacion daus dos interpelats, per ‘na serada festiva fòra dau cuer de vila.