Andrieu Lagarda e sas contribucions auràn marcat d’una pèira cantonièra le mond occitan. L’òme se revèla coma le mèstre passaire de la lenga, especialament del lengadocian. De la pedagogia al militantisme en passant pels collectatges, de l’escritura a l’audiovisual en passant per la ràdio, de professor a escrivan en passant per contaire, de poèta a jornalista en passant per traductor… e que vos sabi encara, es de bon véser que l’Autor s’aquefèra quand s’agís d’espandir l’occitan tanplan parlat coma escrit. Son òbra es totjorn viva. Sos libres didactics o romançats, trònan en bona plaça dins totas las bibliotècas. Sos diccionaris fan referéncia, sos contes encantan calandrons e contaires, sos relats enluminan les ostals de retirada… Nascut dins le País d’Olmes, a Belestar, i passèt tanben sa jovença. Normal doncas que la comuna e le Cercle Occitan estrenen una placa sus son ostal natal per marcar la reconeissença del país e, al delà, de l’Occitània tota. Amics e amigas, fraires e sòrs de lenga, parents de cultura, seretz les planvenguts, le 19 d’octòbre, a cinc oras e mièja, a la sala de las fèstas de Belestar, 5 Plaça Maurice Rigaud, a aquel eveniment que daissarà brava plaça a lecturas e testimoniatges e que s’acabarà per le veire de la convivéncia occitana.

Omenatge a Andriu Lagarda
19 d’octòbre 2024 a 17h30
5 plaça de Maurice Rigaud, 09300 Belestar