L’Euroregion Pirenèus-Mediterranèa a promogut, per sa quatrena annada consecutiva, divèrsas accions de recampatge de degalhs en entorns naturals protegits. Las accions se realizèron aqueste divendres 4 d’octòbre, dins la Gola de Ter, dins lo Pargue Natural Montgrí, a Torroella de Montgrí, en Catalonha; sus la plaja d’Es Grau, dins lo Pargue Natural de S’Albufera des Grau, a Menòrca; e a l’embocadura d’Òrb, Domeni de las Orpelhièras, en Besierés.

Tres eveniments que, jos lo nom anglés de “Let’s Clean Up Europe” (LCUE), amassan d’autras accions e iniciativas per sensibilizar sul curum dins tota l’Union Europèa, e an per tòca d’ajudar a sensibilizar los efièches de la pollucion, e mai particularament d’implicar los joves dins la reduccion d’aquel degalhatge. Es per aquela rason qu’ongan LCUE a amassat de fòrças amb Youth for Green ERF (Joventut per un avenidor verd dins l’Euroregion), un projècte europèu menat per l’Euroregion e que cèrca d’assabentar los joves adultes de las politicas comunautàrias sus l’environament, mai que mai lo Pache Verd.

200 quilos de degalhs en una ora

Aquesta quatrena edicion del netejatge matinal simultanèu dins tres espacis naturals litorals protegits a permés non sonque lo recampament de fòrça curum de plastic, pesca, megòts, veire e d’autres, amb un total de 200 quilos en una ora, mas tanben la sensibilizacion a las longas distàncias que los degalhs pòdon percorrer long dels flumes o de la mar per aténher d’endreches naturals que son a priòri luènh de tota activitat umana.

Accion dins las bocas d’Òrb

Dins la region dicha Occitània, la jornada Netegem Euròpa se tenguèt a l’embocadura d’Òrb, Domèni de las Orpelhièras (Besierés). 120 personas i participèron, subretot d’escolans del collègi Marcèu Panhòl de Serinhan e de l’escòla Jules Verne de Valrans, que collectèron 165 quilos de degalhs. A la jornada participèron Cédric Cordier, director de l’Ostal de ma Region Occitània en Erau, e Claire Sarda Vergès, directritz d’Euròpa Dirècte Pirenèus.

Accion dins la Gola de Ter

Dins la Gola de Ter, lo Pargue Natural de Montgrí, las illas Medes e lo Bas Ter (Catalonha), la jornada de netejatge comptava sus 80 participants, subretot d’escolans de l’escòla Guillem de Montgrí de Torroella, que recampèron 10 quilòs de degalhs . A l’accion participèron Jordi Colomí, cònsol màger de Torroella de Montgrí, Ramon Alturo, director del pargue, e Alfred Vara, responsable del departament de prevencion e eficiéncia del curum de l’Agéncia dels Degalhs de Catalonha.

En tot acompanhar los jovents, participèron a la jornada los creators de contenguts catalans Long Li Xue, Queralt Vidal e Martí Ruiz.

Accion sus la plaja d’Es Grau

Sus la plaja d’Es Grau, Pargue Natural de s’Albufera des Grau, a Menòrca (illas Balearas), l’accion de netejatge comptèt sus 50 participants, principalament d’escolans de l’escòla Sant Josep de Maon, que recampèron 25 kilos de degalhs. Una accion a la quala venguèt lo secretari general de l’Euroregion Pirenèus-Mediterranèa, Xavier Bernard-Sans, qu’expliquèt que las accions aquestas devon servir “a far veire als joves  la Mediterranèa coma lor proprietat que cal protegir”. A l’eveniment tanben participèron Héctor Ponts, cònsol màger de Maon; Simón Gornés, ministre regional de l’environament de Menòrca; Marta Cano, responsabla de la Fondacion de las Illas Balearas per l’Accion Extèrna; David Martínez, director del pargue; Gabriel Bardi, cap del servici de l’educacion a la qualitat e de l’environament del govèrn; e Jorge Moreno, responsable del departament de las zònas naturalas del govèrn.

Agenda 2030

L’Euroregion Pirenèus-Mediterranèa es un projècte politic de cooperacion territoriala transfrontalièra nascut en 2004. L’Euroregion es compausada del govèrn de las illas Balearas, de la region dicha Occitània e de la Generalitat de Catalonha, que ten actualament la presidéncia de l’organisme. D’accions d’aquela sòrta de recampatge de degalhs de plajas protegidas fan partida de l’execucion de las tòcas per 2030, sus la proteccion e la restauracion de l’entorn natural per un avenidor resilient partejat per aquestes territòris.