Mentre qu’en Comtat Venaicin se ten lo jutjament de l’afar dels violaments de Masan, se prepara en Bretanha un nòu e esglasiant procès judiciari de violéncia sexuala que se tendrà en 2025. Joël Le Scouarnec, un cirurgian de 72 ans, es acusat d’aver violats o  agarrits sexualament 299 pacients, en majoritat menors, del temps que èran inconscients dins la sala d’operacion. Se crei qu’es un dels màgers pedocriminals de l’istòria de França.

Segon Stéphane Kellenberger, lo procuraire de Lorient de Bretanha (An Oriant, en breton), lo procès serà d’una granda amplor, tant per la gravetat de las acusacions coma pel nombre de victimas. Los eveniments remontan a entre 1989 e 2014, quand Le Scouarnec, originari de París malgrat son patronim breton, trabalhava dins mantun espital en Turena, Bretanha e Charanta. L’enquista, que se clavèt en julhet, a revelat que la  màger part de las victimas avián mens de 15 ans, amb una edat mejana de sonque 11 ans.

Lo cirurgian, que foguèt ja condemnat en 2020 a 15 ans de preson per aver violada la filha dels vesins, aprofechava la vulnerabilitat dels pacients anestesiats per cometre los abuses. Las enquistas an trobadas de pròvas clau dins de quasèrns personals ont enregistrèt meticulosament de detalhs sus sas victimas e suls crimes perpetrats. Aquò permetèt d’identificar las victimas, qu’en fòrça cases se ramentavan pas dels eveniments perque èran inconscientas o medicalament ensucadas.

Lo jutjament, que se debanarà a Vannas (Gwened, en breton), deuriá aver una repercussion mediatica enòrma e Le Scouarnec risca fins a vint ans de preson. En mai d’aquò, una enquista parallèla es estada dobèrta contra los espitals ont trabalhèt a prepaus d’un eventual amagament d’aqueles abuses.