Una pèça d'art de l'artista auvernhat Alexandre Lavet es estada recuperada après èsser estada getada per error dins l'escobilhièr al musèu LAM (Païses Basses), consagrat a l'art culinari. L'òbra, entitolada Totes los bons moments que passam amassa, consistís en doas boitas de bièrra voidas, pintadas a la man amb de detalhs acrilics, una d'elas esclafada. Aquela pèça, que simboliza de recòrds partejats amb d'amics, èra expausada dins un trauc d'ascensor de veire, çò que menèt un tecnician a la confondre amb de bordilhas e la getar, çò rapòrta lo musèu.

Lo conservator del musèu remarquèt la desaparicion e capitèt a recuperar las boitas intactas abans que foguèsse tròp tard. A causa d’aquela incompreneson, lo musèu a decidit de desplaçar l’òbra a l’intrada, en l’expausant sus un pedestal per evitar mai de confusion. La direccion del centre contunha de perpensar a ont plaçar la pèça d’un biais permanent, en mantenent l’esperit de presentar los objèctes de la vida vidanta amb una novèla perspectiva.

Nascut en 1988 a Clarmont-Ferrand, Alexandre Lavet es un artista conegut per explorar los concèptes de void, desaparicion e escafament per mejan de son òbra, amb la tòca de destacar los detalhs unics dels espacis de las exposicions. A realizat divèrsas exposicions individualas e collectivas a l’escala internacionala. A l’ora d’ara, demòra e trabalha a Brussèlas.