L’Institut d’Estudis Occitans alèrta sus la situacion preocupanta de la lenga occitana en Lemosin, ont son aprendissatge a l’escòla coneis un declin inquietant, çò rapòrta France Bleu. Malgrat una convencion signada en 2018 entre l’acadèmia (circonscripcion escolara) de Lemòtges, l’Ofici Public de la Lenga Occitana e la region dicha Nòva Aquitània, l’aplicacion d’aquel acòrdi sembla insufisenta, entrainant aital un demesiment progressiu del nombre d’escolans qu’estúdian l’occitan.

Pierre-Emmanuel Beume, professor d’occitan al collègi de Selhac (País de Tula), constata una baissa significativa de l’efectiu de sos occitanistas, que son d’efièch ara mens nombroses que de per abans. Soslinha que l’occitan es percebut per cèrts escolans coma una lenga estrangièra, mentre que s’agís, per fòrça d’eles, de la lenga de lors ancessors e, en general, de la cultura locala. Beume s’interròga sus las rasons qu’an conduch a aquel besonh de tornar descobrir una lenga qu’un còp èra fasiá partida integranta de lor patrimòni.

L’ensenhaire ramenta tanben l’importància de l’occitan per comprene son environament. Per exemple, l’ortografia en francés de la vila, Seilhac, amb son digrama “lh”, fa pròva de son eiretatge occitan. En mai de son aspècte cultural, Beume soslinha los avantatges del bilingüisme, que favoriza l’aprendissatge d’autras lengas e enriquís los escolans sul plan personal.

Magali Urroz, de l’Institut d’Estudis Occitans, denoncièt tanben dins una entrevista a FranceBleu l’ineficacitat de la convencion signada en 2018. “Comptam 140 escolans en tot Lemosin, valent a dire dins tres departaments, mentre que dins la vesina Dordonha, mai de 2000 escolans estúdian l’occitan. La diferéncia es picanta”, çò declarèt.