Renfe, la societat estatala espanhòla dels camins de fèrre, a anonciat que començariá un servici de trens de granda velocitat (TGV) entre Barcelona e Tolosa al segond trimèstre de 2025. La linha inclurà d’arrèstes dins las estacions ferroviàrias de Carcassona, Perpinhan, Figueres e Girona. La durada totala del trajècte serà de tres oras e mièja.

En mai d’aquò, l’operator a precisat que prevesiá d’organizar los oraris de faiçon que los viatjaires prenguèsson d’autres trens que los menarián a d’autras vilas dels Païses Catalans coma Tarragona, Valéncia, Lhèida o Castelhon de la Plana.

Inicialament, la linha foncionarà de manièra sasonièra, valent a dire de la prima fins a mièg setembre. Renfe se resèrva la possibilitat de perlongar aquel servici en foncion de la demanda.

A l’ora d’ara, la companhiá trabalha a l’obtencion del certificat de seguretat necessari per efectuar aquel servici. Un còp aquel certificat obtengut, entamenarà la formacion del personal e anonciarà las datas de mesa en venda de las bilhetas e de debuta del servici.

Article adaptat de Vilaweb.