Ongan, Wigan aviá ja ganhadas la Copa del Mond dels clubs e la Copa d’Anglatèrra e emportat lo bloquièr de primièr de la fasa de classament. Mas los ògres coneisson pas de pausa per çò qu’es de la talent.

Aqueste dissabte, a Old Trafford, ont unes 70 0000 espectators s’èran remosats, Hull KR e Wigan disputavan la finala de la Superliga. Hull KR dominèt, mas una iniciativa de Bevan French, lo dobertura de Wigan, dobriguèt la marca: trapèt lo trauc dins la linha defensiva, escapèt a l’arrièr per puntar l’ensag entre los pals. Amb un tombat sus la còrna, Wigan menava 7-0 a la pausa. La granissa se convida dins la partida a la represa. Una penalitat capitada permet als Barbarosses d’esperar, mas Wigan replica tanben per una penalitat. Wigan ganha doncas 9-2 aquela partida enlevada.

Ara, en 2025, poiràn pas renovelar lo quadruplat d’ongan, que Penrith a anonciat que comptava pas de venir jogar la partida entre los campions de Superliga e d’NRL. Una decision que marca la manca de volontat internacionala al plan dels rescontres entre Nòrd e Sud de la planeta. Damatge!

Championship: Tolosa en finala

En mièja finala del Championship, dimenge, lo Tolosa Olimpic recebiá Bradford. Los angleses menavan 12-8 a la pausa. Tolosa marcava dos ensages transformats per passar davant 20-14. Elòi Pelissièr darrièr un tengut ensaca lo tombat. Lo darrièr ensag transformat de Bradford daissarà la victòria als occitans: 21-20.

Dissabte que ven, en finala, lo TO anirà desfisar Wakefield, venceire de York, en faguent tanben la diferéncia dins lo segond temps: 22-13.

Tròp fòrts los australians

Dimars passat, los U19 de França rescontravan los Australian Schoolboys. Preses a freg, al cap de 3 minutas, avián ja encaissats dos ensages. Fin finala, desfaita 8-58. Una virada formatritz pels joves Pols.

Limós-Carcassona en cap d’aficha

Al programa de la quatrena jornada del Super-XIII, lo dèrbi entre lo primadièr Limós e lo campion Carcassona aqueste dimenge a l’Agulha. Las autras partidas se jogaràn tre dissabte: Avinhon-Dragonets; Lesinhan-Pià; Albi-Vilanòva; St Gaudenç-Tolosa

Las formacions d’Elèit 2 disputaràn lo primièr torn de la Copa de França amb un rescontre dissabte (Pàmias-Illa) e tres dimenge (Selon-VARL; l’Escura-Tonens; Carpentràs-Realmont). Palau es qualificat d’ofici pels ueitens.

Rendètz-vos internacionals

Dissabte, a Atenas, las irlandesas batèron las grègas 42-6 e ganhan lo dreit de participar al torneg mondial a quatre amb Nigèria, las representantas d’America e del Pacific per designar la darrièra formacion qualificada pel rendètz-vos mondial de 2026.

A Pòrt Moresby, s’afrontavan las esquipas de Papoa e d’Austràlia designadas pels primièrs ministres respectius. Austràlia emportèt las doas partidas: 50-0 per las australianas e 42-20 pels australians .

Debuta del campionat del Pacific amb divendres las oposicions Austràlia/Tònga e, dissabte, Fiji/Papoa-Nòva Guinèa. Cò de las femnas, partidas Austràlia/Papoa-Nòva Guinèa divendres e Tònga-Samoa dissabte.

A Domèc, dimars 22, se jogarà lo primièr torn del torneg europèu en vista de la qualificacion per la Copa del Mond de 2026: Galas/Serbia (17h) e França-Ucraïna (19h30).