Los cavaments arqueologics contunhan a la futura estacion François Verdier de la 3a linha de mètro a Tolosa. Dempuèi junh, los arqueològs de l’Institut Nacional de las Recèrcas Arqueologicas destapan de vestigis istorics qu’èran fins ara amagats.

Segon La Dépêche du Midi, a la fin d’agost, las descobèrtas inclusián ja un aqüaducte, de fòssas utilizadas coma bordilhièrs, de cavas medievalas e un forn de ceramica del sègle XIII. Aquel sit, situat just a l’exterior del barri roman e a proximitat d’una anciana pòrta de la vila, a una importància estrategica pels cercaires.

Los arqueològs sortisson d’aténher lo periòde de l’Antiquitat tardiva, entre los sègles IV e VI, una epòca marcada per la casuda de l’Empèri Roman d’Occident e las invasions dels visigòts. Demest las descobèrtas mai interessantas i a tres tombas, que contenián los ossaments de dos adultes e d’un nenon, dont una barrada per de grands teules en forma de V.

Las excavacions an tanben revelada una fòssa de cremacion amb de residús e d’ofrendas, aital coma lo pasiment d’una carrièra anciana. Aquelas descobèrtas confirman la preséncia d’una necropòli, similara a aquela destapada en 2002 pendent la bastison de la linha B del mètro.

Los cavaments se perseguiràn fins en decembre, mentre que los trabalhs de perforacion de la 3a linha contunhan jols pès dels arqueològs.